বুধবাৰে ৫০ সংখ্যক কাৰবি যুৱ মহোৎসৱত (Karbi Youth Festival) অংশগ্ৰহণ কৰিব নোৱাৰিলে দেশৰ ৰাষ্ট্ৰপতি দ্ৰৌপদী মূৰ্মূ (President Draupadi Murmu)৷ বতৰৰ বিধি পথালিৰ বাবে শ্বিলঙৰ পৰা ভ্ৰমণ বাতিল কৰিবলৈ বাধ্য হ’ল ৰাষ্ট্ৰপতিগৰাকী৷ ৰাষ্ট্ৰপতিগৰাকীৰ অহাক লৈ অধীৰ অপেক্ষাৰে তাৰালাংচৰ মহোৎসৱ থলীত অধীৰ অপেক্ষাৰে বাট চাই আছিল কাৰবি আংলঙৰ লক্ষ্যাধিক লোক আৰু আয়োজক কাৰবি কালচাৰেল ছ’চাইটি৷
কাৰবি পৰাম্পৰাগত সাজ-পোছাকেৰে ৰাষ্ট্ৰপতিগৰাকীক আদৰিবলৈ সাজু হৈ আছিল শিল্পীসকল৷ পুৱাৰ পৰাই সমগ্ৰ ডিফু চহৰৰ লগতে তাৰালাংচৰ মহোৎৱস্থলীত অসমৰ বিভিন্ন প্ৰান্তৰ আৰক্ষী, অৰ্দ্ধ সামৰিক বল মজুত কৰি এক প্ৰকাৰ অভেদ্য নিৰাপত্তা বেষ্টনী গঢ়ি তোলা হৈছিল৷
ৰাষ্ট্ৰপতিগৰাকীৰ অনুপস্থিত অনুষ্ঠিত হোৱা সভাখনত অসম বিধানসভাৰ উপাধ্যক্ষ ডঃ নোমল মমিন, মন্ত্ৰীদ্বয় যোগেন মোহন, নন্দিতা গাৰ্লোছা, বিধায়কসকল বিদ্যাছিং ইংলেং, দৰছিং ৰংহাঙ, কাৰবি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য ডঃ তুলিৰাম ৰংহাঙ, কেচিএছৰ সভাপতি চন্দ্ৰছিং ক্ৰ’কে প্ৰমুখ্য কৰি গণ্যমান্য ব্যক্তিসকল উপস্থিত থাকে৷ কেচিএছৰ সভাপতি চন্দ্ৰছিং ক্ৰ’ই আদৰণি ভাষণ প্ৰদান কৰে৷
ৰাষ্ট্ৰপতিগৰাকীৰ অনুপস্থিতিত অসমৰ মুখ্যমন্ত্ৰী ডঃ হিমন্ত বিশ্ব শৰ্মাই মুখ্য অতিথিৰ (Dr. Himanta Biswa Sarma is Chief Guest) ভাষণত ৰাষ্ট্ৰপতি গৰাকী প্ৰতিকুল বতৰৰ বাবে তাৰালাংচৰ মহোৎস্থলীত আহিব নোৱাৰাত দুখ প্ৰকাশ কৰে৷ ভৱিষ্যতে ৰাষ্ট্ৰপতিগৰাকীক পুণৰ তাৰালাংচ মহোৎসৱত অনাৰ প্ৰতিশ্ৰুতি প্ৰদান কৰে৷
আনহাতে উত্তৰ-পূৰ্বাঞ্চলৰ আটাইতকৈ পুৰণি কাৰবি যুৱ মহোৎসৱলৈ এতিয়াৰে পৰা ৰাজ্য চৰকাৰৰ তৰফৰ পৰা বছৰি ৩ কোটি টকা আৰ্থিক সাহায্য প্ৰদান কৰি যাব বুলি আশ্বাস প্ৰদান কৰে৷
ভৱিষ্যতে কাৰবি যুৱ মহোৎসৱক বিশ্ব দৰবাৰলৈ লৈ যাবলৈ কেচিএছৰ লগতে অসম চৰকাৰেও যুটীয়াভাবে প্ৰচেষ্টা চলাই যাব বুলি কয়৷
