হাৰিয়ানাৰ চাইবাৰ চহৰ গুৰুগ্ৰামত হাহাকাৰ। ব্যক্তিগতকৰণৰ প্ৰতিবাদত বিদ্যুৎ বিভাগৰ কৰ্মচাৰীয়ে ধৰ্মঘট কৰাত সমগ্ৰ চহৰখনৰ বাবে এক বৃহৎ দুৰ্যোগৰ সৃষ্টি কৰিছে। গুৰুগ্ৰামত ৪০ ঘণ্টাৰো অধিক সময় বিদ্যুৎবিহীন হৈ আছে। উশাহ বন্ধ হৈ পৰিছে মহানগৰবাসীৰ। ১৫০০ টা কাৰখানাত উৎপাদন বন্ধ হোৱাৰ উপক্ৰম হৈছে। উল্লেখ্য যে ৰাজ্যখনৰ বিদ্যুৎ বিভাগৰ কৰ্মচাৰীয়ে তিনিদিনীয়া ধৰ্মঘটৰ আহ্বান জনাইছে। যাৰ বাবে মহানগৰীৰ বিভিন্ন প্ৰান্তত বিদ্যুৎ বিচ্ছিন্ন হৈ পৰিছে।
মহানগৰীৰ একাংশ ৰাইজে কয় যে তেওঁলোকে প্ৰথমে ইনভাৰ্টাৰেৰে ঘৰৰ লাইট জ্বলাই ৰাখিবলৈ চেষ্টা কৰিছিল। কিন্তু ইনভাৰ্টাৰৰ চাৰ্জো শেষ হৈ গৈছে। কিন্তু আটাইতকৈ ডাঙৰ সমস্যা হৈছে খোৱাপানী। বিদ্যুতৰ অভাৱৰ বাবে খোৱাপানীৰ হাহাকাৰ হৈছে। হাৰিয়ানা বিদ্যুৎ নিয়ন্ত্ৰণ আয়োগে গুৰুগ্ৰাম আৰু নুহৰ বিদ্যুৎ যোগান ব্যৱস্থা ব্যক্তিগত কোম্পানীক গতাই দিয়াৰ সিদ্ধান্ত গ্ৰহণ কৰিছে। কিন্তু আয়োগৰ এই সিদ্ধান্তৰ বিৰোধিতা কৰিছে বিদ্যুৎ কৰ্মীসকলে। ইয়াৰ প্ৰতিবাদত তিনিদিনীয়া ধৰ্মঘটত নামি পৰিছে তেওঁলোক।
বুধবাৰৰ নিশাৰ পৰা গুৰুগ্ৰাম আৰু নুহৰ বিভিন্ন প্ৰান্তৰ পৰা বিদ্যুৎ বিচ্ছিন্ন হোৱাৰ খবৰ আহিবলৈ আৰম্ভ কৰে। ইয়াৰ পিছত সময় পাৰ হৈ যোৱাৰ লগে লগে চহৰ দুখনৰ বেছিভাগ ঠাইতে বিদ্যুৎ যোগান বন্ধ হৈ পৰে। গুৰুগ্ৰামত আটাইতকৈ বেছি ক্ষতিগ্ৰস্ত হৈছে। এই চহৰখনত বহু কাৰখানা আৰু কাৰ্যালয় আছে। ঔদ্যোগিক এলেকাৰ পৰা আৱাসিক এলেকালৈ ধাপে ধাপে বিদ্যুৎ যোগান বিচ্ছিন্ন হৈ পৰে। অভিযোগ অনুসৰি, বিদ্যুৎ বিভাগক বাৰে বাৰে ফোন কৰাৰ পিছতো কোনো সমাধানৰ সন্ধান পোৱা নাই। হেল্পলাইনত ফোন কৰাৰ পিছতো কোনো লাভ নাই।
স্থানীয় সূত্ৰ অনুসৰি, গুৰুগ্ৰামত বিদ্যুতৰ গ্ৰাহক ৮.৫ লাখ। বৃহস্পতিবাৰে ৫০ হাজাৰ ঘৰত বিদ্যুৎ বিচ্ছিন্ন হয়। ফাৰুকনগৰৰ পালাম বিহাৰ, নতুন পালাম বিহাৰ, অশোক বিহাৰ, ছেক্টৰ-৪, ছেক্টৰ-৫, ছেক্টৰ-৯, ছেক্টৰ-১০৪, ফাৰুকনগৰৰ বাসিন্দাসকলে আটাইতকৈ বেছি সমস্যাৰ সন্মুখীন হৈছে। ধাৰাবাহিকভাৱে বিদ্যুৎ বিচ্ছিন্ন হোৱাৰ বাবে মহানগৰবাসীয়ে প্ৰতিবাদত ৰাজপথলৈ ওলাই আহিছে। বিদ্যুৎ পুনৰুদ্ধাৰৰ দাবীত ঠায়ে ঠায়ে বন্ধ হৈ আছে পথ। মুঠতে বিদ্যুৎ কৰ্মচাৰীৰ এই ধৰ্মঘটৰ বাবে গুৰুগ্ৰামত হাহাকাৰৰ সৃষ্টি হৈছে।
