যোৱা ১২ জানুৱাৰীৰ পৰা ৭ দিনীয়াকৈ অনুষ্ঠিত হৈ থকা কাৰবি যুৱ মহোৎসৱৰ সোণালী জয়ন্তীৰ আজি অন্তিম দিনা জন অৰণ্যত পৰিণত হয় কাৰবি যুৱ মহোৎসৱস্থলী তাৰালাংচ ৷ অন্তিম দিনা বিভিন্ন প্ৰতিযোগিতাত অংশ গ্ৰহণ কৰি বিজয়ী হোৱা শিল্পী আৰু মণ্ডল সমূহক বঁটা প্ৰদান কৰা হয় ৷
তাৰালাংচত নৱ নিৰ্মিত অত্যাধুনিক প্ৰেক্ষাগৃহ ছেৰটালিনত এক বিশেষ অনুষ্ঠান যোগে প্ৰতিযোগী সকলক বঁটা প্ৰদান কৰাৰ লগতে বহু ব্যক্তিক সম্বৰ্ধনা জনোৱা হয় লগতে বহু কেইখন গ্ৰন্থও উন্মোচন কৰা হয় ৷
এই উপলক্ষে হোৱা অনুষ্ঠানত মুখ্য অতিথি ৰূপে উপস্থিত থাকে পৰিষদৰ মুখ্য কাৰ্যবাহী সদস্য তুলিৰাম ৰংহাঙ ৷ সংবাদ মাধ্যমৰ সৈতে হোৱা বাৰ্তালাপত ৰংহাঙে সোণালী জয়ন্তী বৰ্ষৰ সফল সমাপ্তিৰ বাবে জিলাবাসীৰ লগতে অসমবাসীক ধন্যবাদ জ্ঞাপন কৰে ৷
এইবাৰ অভিলেখ সংখ্যক বিদেশী অতিথিয়ে যুৱ মহোৎসৱ উপভোগ কৰে বুলিও ৰংহাঙে জানিবলৈ দিয়ে ৷ অহা বৰ্ষত পুণৰ ৰাষ্ট্ৰপতিক যুৱ মহোৎসৱত অংশ গ্ৰহণ কৰিবলৈ আমন্ত্ৰণ জনাব বুলিও ৰংহাঙে জানিবলৈ দিয়ে ৷
ৰংহাঙে লগতে কয়যে, অহা ২১ জানুৱাৰীত বাঁহৰ কেটেপাত খোজ কঢ়া ” কেং দংদাং” গিনীজ ৰেকৰ্ড গঁঢ়াৰ প্ৰচেষ্টা চলোৱা হব ৷ বকলীয়া ঘাটৰ বাইপাছত এই অভিলেখ গঢ়াৰ প্ৰচেষ্টা হাতত লোৱা হব বুলি প্ৰকাশ কৰি ৰংহাঙে জিলাবাসীক ইয়াত উপস্থিত থাকিবলৈ আহ্বান জনায় ৷
