খটখটী আৰক্ষীৰ (Khatkhati Police)বৃহৎ সফলতা। খটখটী আৰক্ষীৰ তালাচীত উদ্ধাৰ প্ৰায় ডেৰ কেজি নিষিদ্ধ দ্ৰব্য। খটখটী আৰক্ষী থানাৰ অন্তৰ্গত এছ বি আইত নিয়মীয়া নাকা তালাচীৰ সময়ত এই নিষিদ্ধ পপিষ্ট্ৰ’খিনি উদ্ধাৰ কৰা হয়। লগতে ইয়াৰ সৰবৰাহৰ সৈতে জড়িত থকাৰ অভিযোগত দুজন লোকক আটক কৰে খটখটী আৰক্ষীয়ে।
আৰক্ষীৰ সূত্ৰে জানিব পৰা মতে, নিয়মীয়া নাকা তালাচীৰ সময়ত মণিপুৰৰ দিশৰ পৰা বোকাজান অভিমুখে গৈ থকা এখন ট্ৰাকৰ পৰা উদ্ধাৰ কৰা হয় এই নিষিদ্ধ দ্ৰব্যখিনি। ট্ৰাকখনৰ পঞ্জীয়ন নং হৈছে PB-11-CB-7556। ট্ৰাকখনৰ কেবিনৰ ভিতৰত লুকৱাই অনা হৈছিল এই পপিষ্ট্ৰ’খিনি। ৪টা প্লাষ্টিকৰ পেকেটত ভৰাই অনা এই পপিষ্ট্ৰ’খিনিৰ ওজন ১ কেজি ৩৬ গ্ৰাম বুলি খটখটী আৰক্ষীৰ সূত্ৰত প্ৰকাশ।
আনহাতে, আটক কৰা লোক দুজন হৈছে কালাৰাম সমানা মাণ্ডী, থানা সমানা, জিলা পাটিয়ালা, পঞ্জাবৰ জগতাৰ সিং (৪০, পিতা পূৰণ সিং) আৰু ভুল্লাৰহেৰি, থানা সদৰ ধুৰি, জিলা সংগ্ৰুৰ, পঞ্জাবৰ গুৰপ্ৰীত সিং (৩১, পিতা প্ৰয়াত পৰগত সিং)। দুয়োকে আটক কৰি আৰক্ষীয়ে তদন্ত অব্যাহত ৰখা বুলি জানিব পৰা গৈছে।এই তালাচী অভিযান খটখটী থানাৰ ভাৰপ্ৰাপ্ত আৰক্ষী বিষয়া সূৰ্য কুমাৰ বৰা, উপ-পৰিদৰ্শক দেৱশীষ বৰা আৰু থানাৰ অন্যান্য আৰক্ষীৰ সহযোগত চলিছিল।
