শুকুৰবাৰে কাৰ্বি আংলং (Karbi Anglong)ৰ উত্তৰ বড়বিল উপ-আৰক্ষী চকীৰ অন্তৰ্গত ফুলনি নগৰ (Pholoni)ত সংঘটিত হয় এক ভয়ংকৰ পথ দুৰ্ঘটনা (Road Accident)। এই দুৰ্ঘটনাত গুৰুতৰভাৱে আহত হয় এজন ব্যক্তি। বৰ্তমান তেওঁ সংকটজনক অৱস্থাত চিকিৎসাধীন হৈ আছে।
ঘটনাৰ বিৱৰণী অনুসৰি, গুৱাহাটীৰ দিশৰ পৰা ডিমাপুৰ অভিমুখী এখন ৰডভৰ্তি ট্ৰাকে এখন স্কুটিত খুন্দা মাৰে। দুৰ্ঘটনা সংঘটিত কৰা মালবাহী ১৬ চকীয়া ট্ৰাকখনৰ নম্বৰ হৈছে HR-58-C-8233।
আনহাতে, স্কুটিখনৰ নম্বৰ হৈছে AS-02-H-3826। ট্ৰাকচালকজনক উত্তৰ প্ৰদেশৰ আনচুৱাৰ বুলি চিনাক্ত কৰা হৈছে। আনহাতে, স্কুটি আৰোহীজন ফুলনি বাচ’ক ৰংফাৰ গাঁৱৰ বিষ্ণুৰাম তিমুং (Bishnuram Timung) (৬০) বুলি জানিব পৰা গৈছে।
দুৰ্ঘটনাটো ইমানেই ভয়ংকৰ আছিল যে স্কুটি আৰোহীজনৰ দুয়োখন ভৰি ছিঙি যায়। ঘটনা সংঘটিত হোৱাৰ পিছতে দুৰ্ঘটনাস্থলীত উত্তৰ বড়বিল উপ-আৰক্ষী চকীৰ আৰক্ষী বিষয়াসকল উপস্থিত হৈ দুৰ্ঘটনাত পতিত হোৱা স্কুটি আৰোহী বিষ্ণুৰাম তিমুঙক ফুলনি মডেল হাস্পতাললৈ লৈ যোৱা হয়। কিন্তু উন্নত চিকিৎসাৰ বাবে তাৰ পৰা তেওঁক ততাতৈয়াকৈ ডিফু চিকিৎসা মহবিদ্যালয়লৈ প্ৰেৰণ কৰে। বাতৰি লিখা পৰলৈকে জানিব পৰা মতে, বিষ্ণুৰাম তিমুঙৰ অৱস্থা সংকটজনক।
