ধিঙত সংঘটিত বৰ্বৰ ধৰ্ষণ কাণ্ডৰ মূল অভিযুক্তৰ মৃত্যু। পুখুৰীত পৰি মৃত্যু হোৱা বুলি জানিব পৰা গৈছে এই নিৰ্মম কাণ্ডৰ মূল অভিযুক্তৰ। প্ৰাপ্ত খবৰ অনুসৰি, তদন্তৰ বাবে ঘটনাস্থলীলৈ নিয়াৰ সময়ত তফাজ্জুল ইছলাম নামৰ মূল অভিযুক্তই আৰক্ষীৰ জিম্মাৰ পৰা পলাবলৈ চেষ্টা কৰি পুখুৰীত জাঁপ দিয়ে। ফলত তাতেই সলিল সমাধি ঘটে লম্পটটোৰ।
শনিবাৰে পুৱা ৪ মান বজাত সংঘটিত হয় এই ঘটনাটো। আৰক্ষীয়ে ইতিমধ্যে মৃতদেহটো উদ্ধাৰ কৰিছে৷উল্লেখযোগ্য যে আজি পুৱতি নিশা ধৰ্ষণ কাণ্ড সংঘটিত হোৱা স্থানলৈ আৰক্ষীয়ে তদন্তৰ বাবে লৈ গৈছিল। কিন্তু তাতেই আৰক্ষীৰ হাতৰ পৰা পলাবলৈ চেষ্টা কৰি অভিযুক্তই সমীপৰ এটা পুখুৰীত জাঁপ দিয়ে।
ইয়াৰ পিছত প্ৰায় দুঘণ্টাৰ অনুসন্ধানৰ অন্তত অভিযান চলাই আৰক্ষীয়ে অভিযুক্তৰ মৃতদেহটো উদ্ধাৰ কৰে।অৱশ্যে ঘটনা সন্দৰ্ভত আৰক্ষীয়ে আনুষ্ঠানিকভাৱে এতিয়ালৈকে একো জনোৱা নাই।
