আমেৰিকাৰ ৰাষ্ট্ৰপতি জো বাইডেনে (Joe Biden) আমেৰিকাৰ ছিলিকন ভেলী (Silicon Valley, America) বেংকৰ পতনৰ বাবে দায়ীসকলক সকীয়াই দিয়ে। ইয়াৰ বাবে সকলোকে জবাবদিহি হʼব লাগিব বুলিও তেওঁ কয়। আমেৰিকাৰ ষোড়শ বৃহত্তম বেংক আছিল ছিলিকন ভেলী। যোৱা শুকুৰবাৰে বেংকটো বন্ধ কৰি দিয়া হৈছিল।
বেংক দেউলীয়া হোৱাৰ পিছতে বেংকটোৱে সংগ্ৰহ কৰা ধনখিনি চৰকাৰে অধিগ্ৰহণ কৰিছিল। ২০০৮ চনৰ বিশ্ব বিত্তীয় সংকটৰ পিছত খুচুৰা বেংকিং ব্যৱস্থাৰ আটাইতকৈ ডাঙৰ বিফলতা বুলি কোৱা হৈছে।
আমেৰিকাত ছিলিকন ভেলী বেংক অতি জনপ্ৰিয় হৈ পৰিছিল। বহুতে এই বেংকটোক বিশ্বাস কৰি নিজৰ কষ্টোপাৰ্জিত ধন জমা কৰি ৰাখিছিল। কিন্তু ছিলিকন ভেলীৰ দেউলীয়া হোৱাৰ ফলত আমেৰিকাৰ বেংকিং ব্যৱস্থাৰ ওপৰত জনসাধাৰণৰ আস্থা কমি গৈছে। বাইডেনে ইয়াক পুনৰ ঘূৰাই আনিবলৈ চেষ্টা কৰিছে। সোমবাৰে তেওঁ কয় যে নাগৰিকসকলক আশ্বস্ত কৰিবলৈ বেংকিং ব্যৱস্থাৰ উন্নতিৰ বিষয়ে আলোচনা কৰিব।
প্ৰযুক্তিভিত্তিক ষ্টাৰ্টআপত বিনিয়োগ কৰি কম সময়ৰ ভিতৰতে ছিলিকন ভেলী বেংকে বৃহৎ পৰিমাণৰ সঞ্চয় কৰিছিল। এই বেংক কৰ্তৃপক্ষই আমেৰিকাৰ বণ্ডত বিনিয়োগ কৰিছিল। কিন্তু ফেডাৰেল ৰিজাৰ্ভে (Federal Reserve) যোৱা বছৰ মুদ্ৰাস্ফীতি ৰোধৰ বাবে সুতৰ হাৰ বৃদ্ধি কৰিবলৈ আৰম্ভ কৰিছিল, যাৰ ফলত বণ্ডৰ মূল্য হ্ৰাস পাইছিল। কʼৰোনা মহামাৰীৰ পাছত ষ্টাৰ্টআপসমূহো ক্ৰমান্বয়ে দুৰ্বল হৈ পৰিছে। আত্মবিশ্বাস হেৰুৱাই গ্ৰাহকে খৰখেদাকৈ বেংকৰ পৰা ধন উলিয়াবলৈ ধৰে।
