পুনৰ দিল্লীত (Delhi) দলবদ্ধ ধৰ্ষণৰ (Gang Rape) অভিযোগ উত্থাপন। ৩ বছৰীয়া শিশুকন্যাক দলবদ্ধ ধৰ্ষণৰ অভিযোগত ২ যুৱকক গ্ৰেপ্তাৰ কৰে আৰক্ষীয়ে। দিল্লীৰ ফাতেহপুৰ (Fatehpur) বেৰী অঞ্চলৰ ঘটনা।
আৰক্ষীৰ সূত্ৰ অনুসৰি, শুকুৰবাৰে পুৱাৰে পৰা শিশুটি সন্ধানহীন হৈ আছিল। ইয়াৰ পিছত মাক-দেউতাকে শিশুটিক বিচাৰিবলৈ আৰম্ভ কৰে। ওচৰ-চুবুৰীয়া এজনে তেওঁলোকক কয় যে তেওঁ শিশুটিক ওচৰৰ হাবি এখনৰ ফালে যোৱা দেখিছিল। চুবুৰীয়াই লগতে কয় যে শিশুটিৰ সৈতে ২ জন যুৱক আছিল।
তাৰ পিছত মাক-দেউতাকে হাবিত শিশুটিক বিচাৰিবলৈ আৰম্ভ কৰে। তাত তেওঁলোকে কেঁচুৱাটোক কান্দি থকা অৱস্থাত প্ৰত্যক্ষ কৰে। লগতে শিশুটিক ৰক্তাক্ত অৱস্থাত উদ্ধাৰ কৰে। ইয়াৰ পিছত পিতৃ আৰু মাতৃয়ে শিশুটিক লৈ থানালৈ যায়। পিছত শিশুটিক তাৰ পৰাই ইএমএছলৈ লৈ যোৱা হয়। শিশুটি তাত চিকিৎসাধীন হৈ আছে।
ঘটনাৰ তদন্তৰ অন্তত আৰক্ষীয়ে ৰমনিবাস পানিকা (Ramnivas Panika) নামৰ ২৭ বছৰীয়া যুৱক আৰু শক্তিমান সিং (Shaktiman Singh) নামৰ ২২ বছৰীয়া যুৱকক গ্ৰেপ্তাৰ কৰে। দুয়োজন যুৱকেই বিবাহিত। আৰক্ষীয়ে জানিব পাৰে যে তেওঁলোকে আগতে উক্ত অঞ্চলত শ্ৰমিক হিচাপে কাম কৰিছিল।
দিল্লীত সংঘটিত হোৱা নিৰ্ভয়া দলবদ্ধ ধৰ্ষণৰ ফলত দেশত হুলস্থুলৰ সৃষ্টি হয়। তাৰ পিছতো পোহৰলৈ আহিছে কেইবাটাও ধৰ্ষণৰ ঘটনা। শেহতীয়াকৈ দক্ষিণ পশ্চিম দিল্লীৰ হৰিদাস নগৰ অঞ্চলত পোহনীয়া কুকুৰ আৰু পথৰ কুকুৰক খুৱাই থকা অৱস্থাত এগৰাকী মহিলাক নিৰ্যাতন চলোৱাৰ অভিযোগ উত্থাপন হৈছে। দক্ষিণ-পূব দিল্লীৰ উত্তমনগৰ অঞ্চলত জন্মদিনৰ পাৰ্টিত ২ গৰাকী কন্যাক নিৰ্যাতন চলোৱাৰ অভিযোগ যোৱা বৃহস্পতিবাৰে পোহৰলৈ আহে।
