দিল্লীত প্ৰশ্নকাকত ফাদিলবিৰোধী প্ৰতিবাদকাৰীৰ (CJP Protest) ওপৰত আৰক্ষীৰ আক্ৰমণ (Police attack on Protest)ৰ অভিযোগ তদন্তৰ বাবে উচ্চতম ন্যায়ালয়ে (Supreme Court) পাঁচজনীয়া তদন্ত সমিতি গঠন (Formation of a five-member investigative committee) কৰিছে। পাঁচজনীয়া সমিতিখনৰ নেতৃত্বত আছে উচ্চতম ন্যায়ালয়ৰ অৱসৰপ্ৰাপ্ত ন্যায়াধীশ আৰ সুভাষ ৰেড্ডী (R Subhash Reddy)। কমিটীৰ আন সদস্যসকল হ’ল পঞ্জাব আৰু হাৰিয়ানা উচ্চ ন্যায়ালয়ৰ অৱসৰপ্ৰাপ্ত মুখ্য ন্যায়াধীশ ৰবিশংকৰ ঝা, দিল্লী উচ্চ ন্যায়ালয়ৰ অৱসৰপ্ৰাপ্ত ন্যায়াধীশ শলিন্দৰ কৌৰ, চিবিআইৰ প্ৰাক্তন সঞ্চালক ঋষি কুমাৰ শুক্লা আৰু মেঘালয় আৰক্ষীৰ প্ৰাক্তন ডিজি এল আৰ বিষ্ণয়।
যোৱা ২০ জুলাইত ককৰোচ জনতা পাৰ্টীৰ সংসদ ভৱন অভিযানৰ সময়ত আৰক্ষী আৰু নিৰাপত্তা বাহিনীয়ে অত্যধিক বা অপ্ৰয়োজনীয় বল প্ৰয়োগৰ অভিযোগ। যন্তৰ-মন্তৰ আৰু সংসদ অভিযানৰ সময়ত মহিলা প্ৰতিবাদকাৰীক শাৰীৰিক নিৰ্যাতনৰ অভিযোগৰ লগতে প্ৰতিবাদকাৰীয়ে আৰক্ষী জোৱানৰ ওপৰত আক্ৰমণ আৰু চৰকাৰী সা-সম্পত্তিৰ ক্ষতিসাধন কৰাৰ প্ৰত্যুত্তৰ অভিযোগ উত্থাপন কৰিব বুলি শীর্ষ ন্যায়ালয়ে জানিবলৈ দিয়ে৷ ইয়াৰ উপৰি চিচিটিভি আৰু ভিডিঅ’ ফুটেজ আৰু আহত প্ৰতিবাদকাৰীৰ চিকিৎসা বা ক্ষতিপূৰণৰ বিষয়টোও পৰীক্ষা কৰিব। আৰক্ষীয়ে বৈধভাৱে আৰু সমানুপাতিকভাৱে বল প্ৰয়োগ কৰিছিল নেকি তাৰ ওপৰতো বিশেষ গুৰুত্ব দিয়া হ’ব।
উক্ত গোচৰৰ শুনানিৰ সময়ত দিল্লী আৰক্ষীয়ে মঙলবাৰে উচ্চতম ন্যায়ালয়ক শপতনামাযোগে কয় যে চিজেপিৰ ‘চলো সংসদ’ কাৰ্যসূচীত কোনো ধৰণৰ অত্যধিক বল প্ৰয়োগ কৰা হোৱা নাছিল। বাহিনীটোৱে কোনো অবৈধ কাম কৰা নাছিল। কিন্তু সেই ব্যাখ্যাত সন্তুষ্ট ন’হৈ মুখ্য ন্যায়াধীশ সূৰ্য কান্ত, ন্যায়াধীশ জয়মাল্য বাগচি আৰু ন্যায়াধীশ ভি মোহনৰ খণ্ড বিচাৰপীঠে মঙলবাৰে কয় যে উচ্চতম ন্যায়ালয়ৰ তত্ত্বাৱধানত গঠন কৰা এখন কমিটীয়ে ভিডিঅ’ ফুটেজ পৰীক্ষা কৰি সাক্ষীৰ সৈতে কথা পাতিব আৰু অন্যান্য প্ৰক্ৰিয়াৰ জৰিয়তে অভিযোগ আৰু প্ৰতি-অভিযোগৰ সত্যতা পৰীক্ষা কৰিব।
আৰক্ষীয়ে সমদলত অংশগ্ৰহণ কৰাসকলক ‘অত্যাচাৰ’ কৰাৰ অভিযোগ উত্থাপন কৰি উচ্চতম ন্যায়ালয়ৰ স্বতঃপ্ৰণোদিতভাৱে হস্তক্ষেপ বিচাৰিছিল এজন অধিবক্তাই। মুখ্য ন্যায়াধীশ সূৰ্য কান্তৰ খণ্ড বিচাৰপীঠে এই সন্দৰ্ভত জৰুৰী শুনানিৰ বাবে আবেদন খাৰিজ কৰে। আবেদনকাৰীয়ে সেইদিনা ঘটনাৰ ভিডিঅ’ আদালতক দেখুৱাব বিচাৰিছিল। তেতিয়া মুখ্য ন্যায়াধীশে স্পষ্টকৈ কয়, “আমাৰ সময় নষ্ট নকৰিব।”
অৱশ্যে মঙলবাৰে মুখ্য ন্যায়াধীশৰ বিচাৰপীঠে এই অভিযোগ সন্দৰ্ভত উচ্চ পৰ্যায়ৰ কমিটী গঠন কৰাৰ কথা ঘোষণা কৰে। মুখ্য ন্যায়াধীশৰ বিচাৰপীঠে ছলিচিটৰ জেনেৰেল তুষাৰ মেহতাক আন্দোলনৰ সময়ত প্ৰতিবাদকাৰীৰ বিৰুদ্ধে পঞ্জীয়ন হোৱা এফআইআৰৰ তথ্য উচ্চতম ন্যায়ালয়ত দাখিল কৰিবলৈও নিৰ্দেশ দিয়ে। উচ্চতম ন্যায়ালয়ৰ পূৰ্বৰ ৰায় অনুসৰি সেই এফআইআৰ খাৰিজ কৰিব লাগে (যিসকলৰ আগতে কোনো অপৰাধমূলক গোচৰ নাই)।
এই প্ৰসংগত বিচাৰপীঠে পৰ্যবেক্ষণ কৰে, “ছাত্ৰ-ছাত্ৰীৰ জীৱন এতিয়া বিপদত পৰিছে। আমি সেই কথা মনত ৰাখিব লাগিব। তেওঁলোকৰ ভৱিষ্যত আছে। সংবিধানৰ ১৯ নং অনুচ্ছেদ অনুসৰি তেওঁলোকৰ প্ৰতিবাদ কৰাৰ অধিকাৰ আছে।” মেহতাই কয় যে প্ৰতিবাদস্থলীৰ চিচিটিভি ফুটেজ চাই বিগত সময়ত অপৰাধত জড়িত ২৮০০ ‘অসামাজিক ব্যক্তি’ক চিনাক্ত কৰিছে আৰক্ষীয়ে। ২০ জুলাইৰ কাৰ্যসূচীৰ সময়ত অশান্তি বিয়পোৱাতো তেওঁলোকৰ হাত থকাৰ অভিযোগ উত্থাপন হৈছে।
