ককৰোচ জনতা পাৰ্টীৰ (CJP) সংসদ অভিযানৰ (Parliament campaign) সময়ত আৰক্ষীয়ে কৰা ‘অত্যধিক বল প্ৰয়োগ’ (Excessive force) সন্দৰ্ভত কেন্দ্ৰৰ বক্তব্য বিচাৰিছে দিল্লী উচ্চ ন্যায়ালয়ে (Delhi High Court)। চাৰি সপ্তাহৰ ভিতৰত কেন্দ্ৰীয় চৰকাৰ আৰু দিল্লী আৰক্ষীয়ে এই বিষয়ত বিবৃতি দাখিল কৰিব লাগিব। আনহাতে, সংশ্লিষ্ট চিচিটিভিৰ সকলো ফুটেজ, ভিডিঅ’গ্ৰাফী আৰু অন্যান্য ৰেকৰ্ড সংৰক্ষণ কৰিবলৈও আৰক্ষীক আদালতে নিৰ্দেশ দিছে। শিক্ষাৰ ক্ষেত্ৰত দুৰ্নীতি আৰু নীট প্ৰশ্নকাকত ফাদিলৰ প্ৰতিবাদত চিজেপিয়ে ২০ জুলাইত সংসদ অভিযানৰ আহ্বান জনাইছিল। দীৰ্ঘসময় ধৰি দিল্লীৰ যন্তৰ-মন্তৰৰ সন্মুখত ধৰ্ণা কাৰ্যসূচী ৰূপায়ণ কৰি আহিছে। তেওঁলোকৰ সমৰ্থনত আৰু কেন্দ্ৰীয় শিক্ষামন্ত্ৰী ধৰ্মেন্দ্ৰ প্ৰধানৰ পদত্যাগৰ দাবীত অনশন কৰি আছে সোণম ৱাংচুকে। এনে পৰিস্থিতিত কেইবা হাজাৰ লোকে চিজেপিৰ সমদলত যোগদান কৰে। ইয়াৰে এক বৃহৎ অংশ ছাত্ৰ-ছাত্ৰী।
অভিযোগ অনুসৰি, কঠোৰ হাতেৰে এই প্ৰতিবাদ দমন কৰাৰ চেষ্টা কৰা হৈছিল। শান্তিপূৰ্ণ প্ৰতিবাদকাৰীক আৰক্ষীয়ে লাঠিচালনা কৰা বুলিও অভিযোগ উত্থাপন হৈছে। এই সন্দৰ্ভত দিল্লী উচ্চ ন্যায়ালয়ত দুটাকৈ জনস্বাৰ্থজড়িত গোচৰ ৰুজু হৈছে। তাৰ আধাৰত দিল্লী উচ্চ ন্যায়ালয়ৰ মুখ্য ন্যায়াধীশ ডি কে উপাধ্যায় আৰু ন্যায়াধীশ তেজস কাৰিয়াৰ বিচাৰপীঠে আৰক্ষী আৰু কেন্দ্ৰৰ বিবৃতি বিচাৰিছে। ১১ ছেপ্টেম্বৰত এই গোচৰৰ পুনৰ শুনানি গ্ৰহণ কৰা হ’ব। তাৰ পূৰ্বে আৰক্ষী আৰু কেন্দ্ৰই শপতনামাৰ জৰিয়তে নিজৰ বক্তব্য দাখিল কৰিব লাগিব।
দিল্লী উচ্চ ন্যায়ালয়ত আবেদনকাৰীৰ হৈ জ্যেষ্ঠ অধিবক্তা এন হৰিহৰণ, গোপাল শংকৰানাৰায়ণন, বিকাশ সিং উপস্থিত থাকে। তেওঁলোকৰ বক্তব্য, সাংবিধানিক অধিকাৰ সাব্যস্ত কৰি প্ৰতিবাদকাৰীসকলে শান্তিপূৰ্ণভাৱে সমদল উলিয়াইছিল। আৰক্ষীয়ে তেওঁলোকৰ ওপৰত ‘অত্যধিক’ বল প্ৰয়োগ কৰিছিল। মহিলা আৰু শিশুসকলৰ ওপৰতো লাঠিচালনা কৰা হৈছিল। সাধাৰণ পোছাক পৰিহিত একাংশ আৰক্ষী বিষয়াই লাঠি লৈ পথত থকা বুলিও অভিযোগ উত্থাপন হৈছে। অভিযোগ অনুসৰি, লাঠিত তীক্ষ্ণ গজাল লগোৱা আছিল। দিল্লী আৰক্ষীৰ অতিৰিক্ত উপায়ুক্ত সন্দীপ লাম্বাই এগৰাকী মহিলাক কোনো প্ৰৰোচনা নোহোৱাকৈ চৰ মাৰি দিয়াৰ অভিযোগ উঠিছে। আবেদনকাৰীৰ অধিবক্তাসকলেও এই বিষয়ত আদালতৰ দৃষ্টি আকৰ্ষণ কৰে।
ইফালে কেন্দ্ৰক প্ৰতিনিধিত্ব কৰি অতিৰিক্ত ছলিচিটৰ জেনেৰেল এছ ভি ৰাজুৱে ‘পুলিচৰ বৰ্বৰতা’ৰ অভিযোগ অস্বীকাৰ কৰে। প্ৰতিবাদত যদি কোনো লোক আহত হয় তেন্তে ব্যক্তিগতভাৱে আৰক্ষী বা দণ্ডাধীশক এই বিষয়ে অৱগত কৰিব লাগে বুলিও তেওঁ দাবী কৰে। অৱশ্যে আদালতে তেওঁৰ এই প্ৰস্তাৱ নাকচ কৰে। মুখ্য ন্যায়াধীশ উপাধ্যায়ে কয় যে এয়া ব্যক্তিগত ঘটনা নহয়। গতিকে ব্যক্তিগতভাৱে থানালৈ গৈ এজাহাৰ দাখিল কৰাৰ প্রশ্ন নাই৷ অনশন কৰি থকা সোণমক সাধাৰণ পোছাক পৰিহিত আৰক্ষীয়ে যন্তৰ-মন্তৰৰ পৰা লৈ যোৱাৰ বিৰুদ্ধে এক সুকীয়া গোচৰ ৰুজু কৰিছিল। কিন্তু বুধবাৰে উক্ত গোচৰ খাৰিজ কৰে দিল্লী উচ্চ ন্যায়ালয়ে। কাৰণ এই সন্দৰ্ভত সোণমৰ পত্নীৰ গোচৰ ইতিমধ্যে নিষ্পত্তি হৈছে।
