প্ৰায় দুটা দশকৰ পাছত পুনৰ বাংলাদেশত সেনাৰ হাতত শাসন (Rule of Bangladesh is in the hands of the army)। ২০০৭ চনৰ ১১ জানুৱাৰীত অশান্ত পৰিস্থিতিত তদানীন্তন সেনাপ্ৰধান জেনেৰেল মইন-ইউ আহমেদৰ প্ৰত্যক্ষ হস্তক্ষেপত তত্ত্বাৱধায়ক চৰকাৰ গঠন কৰা হৈছিল। ইয়াৰ নেতৃত্ব দিছিল বাংলাদেশ বেংকৰ অৰ্থনীতিবিদ তথা প্ৰাক্তন গৱৰ্ণৰ ফখৰুদ্দিন আহমেদে। এইবাৰ জনসাধাৰণৰ ক্ষোভৰ বাবে প্ৰধানমন্ত্ৰী শ্বেখ হাছিনাৰ পদত্যাগ (Prime Minister Sheikh Hasina resigns) আৰু দেশৰ পৰা আঁতৰি যোৱাৰ পিছত সেনাপ্ৰধান জেনেৰেল ৱাকাৰ-উজ জামান (Army Chief General Walker-uz Zaman)ৰ পৰৱৰ্তী পদক্ষেপ সন্দৰ্ভত চৰ্চা আৰম্ভ হৈছে।
সোমবাৰে বিয়লি দেশবাসীক দিয়া বক্তব্যত জেনেৰেল জামানে প্ৰধানমন্ত্ৰীৰ পদৰ পৰা হাছিনাই পদত্যাগ কৰাৰ বিষয়ে অৱগত কৰি কয়, “আমি ৰাষ্ট্ৰপতিৰ সৈতে সাক্ষাৎ কৰি অন্তৱৰ্তীকালীন চৰকাৰ গঠনৰ প্ৰক্ৰিয়া আৰম্ভ কৰিম।” ইয়াৰ লগতে সেনাধ্যক্ষই বাংলাদেশৰ আন্দোলনকাৰী ছাত্ৰ-ছাত্ৰী আৰু ৰাজনৈতিক কৰ্মীসকলক প্ৰতিবাদৰ পৰা বিৰত থাকিবলৈ আহ্বান জনাই আশ্বাস দিয়ে, “মই প্ৰতিশ্ৰুতি দিছোঁ, প্ৰতিটো হত্যাকাণ্ডৰ বিচাৰ হ’ব।”
উল্লেখ্য, হাছিনাৰ পদত্যাগৰ দাবীত দেশজুৰি প্ৰতিবাদ আৰু হিংসাত্মক পৰিস্থিতিৰ মাজতে দেওবাৰে গভীৰ নিশা ঢাকাৰ নিজৰ বাসগৃহত সেনাবাহিনীৰ জ্যেষ্ঠ বিষয়াৰ সৈতে বৈঠকত মিলিত হয় জেনেৰেলগৰাকীয়ে। ইয়াৰ পিছতে এনে পৰিস্থিতিত সেনাই পোনপটীয়াকৈ হস্তক্ষেপ কৰিবলৈ ওলাইছে বুলি জল্পনা-কল্পনাৰ সৃষ্টি হয়। সূত্ৰ অনুসৰি, হাছিনাই পদত্যাগ কৰি তত্ত্বাৱধায়ক চৰকাৰৰ দায়িত্ব জাতীয় সাংসদৰ (সংসদ) অধ্যক্ষ শ্বিৰিন চৰ্মিন চৌধুৰীৰ হাতত অৰ্পণ কৰে। কিন্তু সেনাই আৱামী লীগৰ নেতা শ্বিৰিনক মানি ল’বনে নাই তাত সন্দেহৰ সৃষ্টি হৈছে। কাকতলীয়াকৈ ক’বলৈ গ’লে ৰাষ্ট্ৰপতি মহম্মদ ছাহাবুদ্দিনো আৱামী লীগৰ প্ৰাক্তন নেতা আৰু হাছিনাৰ ঘনিষ্ঠ হিচাপে পৰিচিত।
উল্লেখ্য যে ভাৰতৰ পূব চুবুৰীয়া দেশখনে ১৯৭১ চনত জন্মলাভৰে পৰা তিনিটাকৈ বৃহৎ পৰিসৰৰ সামৰিক অভ্যুত্থানৰ সাক্ষী হৈ আহিছে। দুজন ৰাষ্ট্ৰপতি শ্বেখ মুজিবুৰ ৰহমান আৰু জিয়াউৰ ৰহমানক সেনাই হত্যা কৰা প্ৰত্যক্ষ কৰিছে। ইয়াৰ উপৰি সেই দেশখনত বিগত প্ৰায় পাঁচ দশকত কেইবাটাও ব্যৰ্থ অভ্যুত্থান ঘটিছে। বাংলাদেশৰ সেনাই চৰকাৰ গঠনৰ ক্ষেত্ৰত অন্তিমবাৰৰ বাবে হস্তক্ষেপ কৰিছিল ২০০৭ চনত। কিন্তু ৰাষ্ট্ৰসংঘৰ বাধা-নিষেধৰ বাবে তদানীন্তন সেনাপ্ৰধান জেনেৰেল মইনে পোনপটীয়াকৈ ক্ষমতা হাতত লোৱা নাছিল।
আনহাতে, বিএনপি নেতা খালেদা জিয়াৰ প্ৰধানমন্ত্ৰী পদৰ কাৰ্যকাল অন্ত পৰাৰ পিছত ক্ষমতা অন্তৱৰ্তীকালীন চৰকাৰৰ হাতত অৰ্পণ কৰা হয় যদিও চৰকাৰৰ বিৰুদ্ধে পক্ষপাতিত্বৰ অভিযোগ উত্থাপন কৰি আৱামী লীগকে ধৰি বিৰোধীয়ে চৰকাৰৰ বিৰুদ্ধে আন্দোলনত সক্ৰিয় হৈ পৰে। নোবেল বঁটা বিজয়ী অৰ্থনীতিবিদ মহম্মদ ইউনুছক প্ৰথমে তত্ত্বাৱধায়ক চৰকাৰৰ প্ৰধানমন্ত্ৰী হিচাপে প্ৰস্তাৱ কৰা হৈছিল। কিন্তু প্ৰত্যাখ্যান হোৱাৰ লগে লগে ফখৰুদ্দিনে তেতিয়াৰ ৰাষ্ট্ৰপতি ইয়াজুদ্দিন আহমেদৰ উদ্যোগত তত্বাৱধায়ক চৰকাৰৰ প্ৰধানমন্ত্ৰীৰ দায়িত্ব লৈছিল।
