উত্তৰাখণ্ড আৰু গুজৰাটৰ পিছত অসম ইউনিফৰ্ম চিভিল কোড (Uniform Civil Code) (ইউচিচি) বা অভিন্ন দেৱানী বিধি প্ৰৱৰ্তন কৰা তৃতীয়খন ৰাজ্য হ’ব অসম। বৃহস্পতিবাৰে এই ঘোষণা কৰে মুখ্যমন্ত্ৰী ডঃ হিমন্ত বিশ্ব শৰ্মাই। তেওঁ লগতে কয় যে এই সন্দৰ্ভত বিধেয়ক উত্থাপন কৰা হ’ব আৰু ইয়াৰ জৰিয়তে জনজাতীয় লোকসকলক এই আইনৰ পৰিসৰৰ পৰা ৰেহাই দিয়া হ’ব।
উল্লেখযোগ্য যে ইউচিচিৰ অৰ্থ হৈছে দেশৰ সকলো নাগৰিকৰ বাবে এক উমৈহতীয়া আইন। মুখ্যমন্ত্ৰীয়ে সংবাদমেলত কয়, “ইউচিচি সন্দৰ্ভত উত্তৰাখণ্ডৰ বিধেয়কলৈ আমি অপেক্ষা কৰি আছো আৰু ইয়াক উত্থাপন কৰাৰ পিছত অসমে কিছুমান অতিৰিক্ত দফাৰে ইয়াক অনুসৰণ কৰিব।”
আনহাতে, ৰাজ্যখনে বাল্যবিবাহ আৰু বহুবিবাহৰ বিৰুদ্ধে যুঁজি থকাৰ সময়তে অসম মডেলৰ আন কিছু উদ্ভাৱনীমূলক দিশৰ কথাও তেওঁ কয়।
মুখ্যমন্ত্ৰীয়ে লগতে কয়, “আমি উত্তৰাখণ্ড বিধেয়কখনৰ জৰিয়তে লক্ষ্য কৰিম যে অহা দুই-তিনি মাহৰ ভিতৰত ইয়াৰ ৰাজহুৱা আলোচনা সম্ভৱ হ’বনে নহয়? কিন্তু যদিহে কিছু জটিলতা আহি পৰে তেন্তে বিষয়টো বিশেষজ্ঞৰ সৈতে আলোচনা কৰা হ’ব আৰু সেই অনুসৰি বিধেয়কখন ফ্ৰেমৱৰ্ক কৰা হ’ব।”
তেওঁ আৰু কয়, “উত্তৰাখণ্ড আৰু গুজৰাটে গৃহীত কৰা বিধেয়কৰ ওপৰত সকলো নিৰ্ভৰ কৰিব, কিন্তু ইউচিচিৰ ওপৰত বিধেয়ক অনা অসম নিশ্চিতভাৱে তৃতীয়খন ৰাজ্য হ’ব।”
ইয়াৰ উপৰি অহা মাহৰ পৰা আৰম্ভ হ’বলগীয়া বিধানসভাৰ বাজেট অধিবেশনত ৰাজ্যখনত বহুবিবাহৰ অন্ত পেলোৱাৰ বাবে এখন বিধেয়ক অনাৰ পৰিকল্পনা কৰা বুলিও মুখ্যমন্ত্রীয়ে কয়৷
“বহুবিবাহৰ অন্ত পেলোৱাৰ বাবে বিধানসভাৰ যোগ্যতা সম্পৰ্কে এখন বিশেষজ্ঞ সমিতিয়ে প্ৰতিবেদন দাখিল কৰিছিল। তাৰ পিছত ৰাজ্যখনত সামাজিক বিপদৰ অন্ত পেলোৱাৰ বাবে প্ৰস্তাৱিত বিধেয়কখনৰ সন্দৰ্ভত ১৫০টা পৰামৰ্শ লাভ কৰা হৈছিল।” মুখ্যমন্ত্ৰীয়ে কয়।
উল্লেখযোগ্য যে ইয়াৰ পূৰ্বেও মুখ্যমন্ত্ৰীয়ে কৈছিল যে তেওঁৰ চৰকাৰে ইউচিচিৰ সমৰ্থনত আছে যদিও বিজেপিশাসিত ৰাজ্যখনত তৎকালীনভাৱে বহুবিবাহ নিষিদ্ধ কৰিব বিচাৰিছে। যদিও ইউচিচি এনে এটা বিষয় যিটো সংসদে সিদ্ধান্ত ল’ব, তথাপিও ৰাষ্ট্ৰপতিৰ সন্মতি সাপেক্ষে তাৰ ওপৰত এখন ৰাজ্যই ব্যৱস্থা ল’ব পাৰে।
