অসম আৰক্ষী সঞ্চালক প্ৰধান হিচাবে নতুনকৈ দায়িত্বভাৰ গ্ৰহণ কৰা জি.পি. সিঙৰ (G.P Singh) উপস্থিতিত অসম আৰক্ষীৰ মুখ্য কাৰ্যালয়ত এখন গুৰুত্বপূৰ্ণ বৈঠক অনুষ্ঠিত হয়। এই বৈঠকত বিভিন্ন জিলাৰ আৰক্ষী অধীক্ষকৰ পৰা উচ্চ পদস্থ বিষয়ালৈকে অংশগ্ৰহণ কৰে।
এই বৈঠকত লোৱা সিদ্ধান্ত সমূহৰ ভিতৰত হৈছে-
১. অসম আৰক্ষীৰ মুখ্য কাৰ্যালয়ৰ লগতে বিভিন্ন জিলাৰ আৰক্ষী অধীক্ষকৰ কাৰ্যালয়ত প্ৰতিটো কৰ্মদিনত পুৱা ১১.৩০ বজাৰ পৰা বিয়লি ১ বজাকৈ এগৰাকী বিষয়া উপস্থিত থাকিব লাগিব আৰু তেওঁৰ ৰাইজৰ বিভিন্ন অভাৱ-অভিযোগ সন্দৰ্ভত আলোচনা কৰি সেইসমূহ শীঘ্ৰে নিষ্পত্তিকৰণৰ ব্যৱস্থা কৰিব। এই কাৰ্যপন্থা অহা ১৩ ফেব্ৰুৱাৰী, ২০২৩ তাৰিখৰ পৰা কাৰ্যকৰী কৰা হ’ব।
২. জৰুৰীকালীন অৱস্থাৰ বাহিৰে অন্য দিনত আৰক্ষী অধীক্ষকৰ অধীনত থকা এলেকা সমূহৰ আৰক্ষী সকলক এটা দিনৰ বাধ্যতামূলক চুটি মঞ্জুৰ কৰা হ’ব। এই নিয়ম থানা তথা আৰক্ষী চকীত থকা ভাৰপ্ৰাপ্ত বিষয়া আৰু চাৰ্ছ পষ্টৰ আৰক্ষীৰ সৈতে প্ৰযোজ্য নহয়।
৩. অসম আৰক্ষীৰ মুখ্য কাৰ্যালয়ৰ লগতে প্ৰতিখন জিলা, বেটেলিয়ানৰ কাৰ্যালয় তথা অসম আৰক্ষীৰ অধীনত থকা অন্যান্য সংস্থাসমূহে অহা দুমাহৰ ভিতৰত মীমাংসা নোহোৱাকৈ থকা কৰ্মচাৰীৰ পেঞ্চন কাম- কাজসমূহ নিষ্পত্তিৰ ব্যৱস্থা কৰিব । লগতে, বৰ্তমান পৰিপ্ৰেক্ষিতত প্ৰাক্ষ এবছৰৰ আগৰ পৰাই অৱসৰ গ্ৰহণ কৰিবলগা বিষয়া-কৰ্মচাৰী তথা অন্যান্য আৰক্ষীৰ লোকসকলৰ পেঞ্চনৰ যাৱতীয় কাম-কাজসমূহ আৰম্ভ হ’ব।
৪. জিলা, বেটেলিয়ানসমূহৰ লগতে আৰক্ষীৰ অন্যান্য সংস্থাসমূহত সকলো মহিলা আৰক্ষীৰ বাবে পৃথক শৌচালয়ৰ ব্যৱস্থা কৰা হ’ব।
৫. আৰক্ষীৰ লোকসকলে ৰাইজে স্পষ্টকৈ দেখাকৈ স্থানীয় বা দ্বি ভাষিক নামপ্লেট লগাব লাগিব।
এই বৈঠকত নতুন আৰক্ষী সঞ্চালক প্ৰধান গৰাকীয়ে সকলো আৰক্ষীক নিজ দায়িত্ব সমূহ নিষ্ঠাসহ পালন কৰাৰ আহ্বান জনোৱাৰ লগতে ৰাইজ তথা সহ কৰ্মীক সন্মান তথা মৰ্যদা প্ৰদান কৰাতো নিশ্চিত কৰিব লাগিব বুলি মন্তব্য কৰে।
