কমতাপুৰ (Kamtapur) আৰু ইষ্টাৰ্ণ নাগালেণ্ডক (Eastern Nagaland) লৈ দুখন সুকীয়া ৰাজ্য (Separate state) গঠনৰ বাবে কেন্দ্ৰীয় চৰকাৰে (Central Goverment) প্ৰক্ৰিয়া আৰম্ভ কৰা বুলি সংবাদ মাধ্যমত (Media) চৰ্চিত হৈ অহাৰ সময়তে কাৰ্বি আংলং (Karbi Anglong) আৰু ডিমা হাচাও জিলাক সামৰি এখন স্বায়ত্তশাসিত ৰাজ্য (Autonomous State) গঠনৰ দাবীত (Claim to form) পুনৰ সৰৱ হৈ পৰিছে পাহাৰীয়া জিলা (Hill district) কেইখনৰ দল-সংগঠন (Party-organization)।
ভাৰতৰ সংবিধানৰ ২৪৪(ক) ধাৰাৰ অধীনত অসমৰ পাহাৰীয়া জিলা কেইখনক সামৰি এখন স্বায়ত্তশাসিত ৰাজ্য গঠনৰ দাবীত আজি ডিফুস্থিত ডিফু চৰকাৰী বালক উচ্চতৰ মাধ্যমিক বিদ্যালয়ৰ খেলপথাৰত এএছডিচি, কেএছএ আৰু কেএনচিএৰ নেতা-কৰ্মীসকলে এক ধৰ্ণা কাৰ্যসূচী ৰূপায়ন কৰে।
এএছডিচি দলৰ সভাপতি চন্দ্ৰকান্ত তেৰাং, কাৰ্বি আংলং স্বায়ত্বশাসিত পৰিষদৰ প্ৰাক্তন মুখ্য কাৰ্যবাহী সদস্য জৎছন বেʼকে ধৰি ভালেকেইগৰাকী বিশিষ্ট ব্যক্তিয়ে অংশগ্ৰহণ কৰা প্ৰতিবাদী কাৰ্যসূচীত বক্তা সকলে স্বায়ত্বশাসিত ৰাজ্যৰ দাবীত সৰৱ হৈ পৰা পৰিলক্ষিত হয়।
সংবাদ মাধ্যমৰে হোৱা বাৰ্তালাপত এএছডিচি দলৰ সভাপতি চন্দ্ৰকান্ত তেৰাঙে কাৰ্বি আংলং আৰু ডিমা হাছাও জিলাক সামৰি ভাৰতীয় সংবিধানৰ ২৪৪(ক) ধাৰাৰ অধীনত এখন স্বায়ত্তশাসিত ৰাজ্য গঠনৰ দাবীত বিগত ৩৬ বছৰে পাহাৰীয়া এলেকাটোত শান্তিপূৰ্ণ প্ৰতিবাদ অব্যাহত থকাৰ পিছতো কেন্দ্ৰীয় চৰকাৰে বিষয়টোত গুৰুত্ব প্ৰদান নকৰা বুলি আক্ষেপ প্ৰকাশ কৰে।
অসমক দ্বিখণ্ডিত নকৰাকৈ অসমৰ ভিতৰতে এখন স্বায়ত্তশাসিত ৰাজ্য গঠনৰ বাবে দল-সংগঠনসমূহে দাবী জনাই অহা বুলি সভাপতি গৰাকীয়ে কয়। আনহাতে, ইষ্টাৰ্ণ নাগালেণ্ড আৰু কমতাপুৰ ৰাজ্য গঠনৰ প্ৰসংগ সন্দৰ্ভত মন্তব্য কৰি ৰাজ্য গঠনৰ ক্ষেত্ৰত কেন্দ্ৰীয় চৰকাৰে গ্ৰহণ কৰা ʼযাকেই ভাল পায় তাকেই ৰাজ্য দিয়াʼ নীতিৰ ফলত পাহাৰীয়া এলেকাটোৰ দীৰ্ঘদিনীয়া দাবীক গুৰুত্ব প্ৰদান নকৰা কাৰ্যক কোনো কাৰণতে মানি লোৱা নহʼব বুলি লগতে সভাপতি গৰাকীয়ে হুংকাৰ প্ৰদান কৰে।
