ভাৰতৰ প্ৰথমটো ব্যক্তিগতভাৱে নিৰ্মিত ৰকেট ‘বিক্ৰম-এছ’ মহাকাশলৈ উৎক্ষেপণ কৰা হ’ল। হায়দৰাবাদৰ ব্যক্তিগত কোম্পানী ‘স্কাইৰুট এৰোস্পেচʼৰ দ্বাৰা নিৰ্মিত ৰকেটটো শুকুৰবাৰে পুৱা অন্ধ্ৰপ্ৰদেশৰ শ্ৰীহৰিকোটাস্থিত সতীশ ধাৱন মহাকাশ গৱেষণা কেন্দ্ৰৰ লঞ্চ পেডৰ পৰা সফলতাৰে উৎক্ষেপণ কৰা হয়। ইয়াৰ নাম ‘বিক্ৰম-এছ’ ৰখা হৈছে।
ইছৰোৰ সূত্ৰ অনুসৰি, ‘বিক্ৰম-এছ’ উৎক্ষেপণৰ পিছতে নিৰ্দিষ্ট কক্ষপথত সফলতাৰে উপনীত হয়। ‘স্কাইৰুট এৰোস্পেচʼৰ এই অভিযানৰ কোড নাম আছিল ‘প্ৰম্ভা’। উল্লেখ্য, ব্যক্তিগত পদক্ষেপত নিৰ্মাণ কৰা প্ৰথমটো ৰকেটৰ নাম ভাৰতৰ প্ৰখ্যাত গৱেষক তথা মহাকাশ পথ প্ৰদৰ্শক বিক্ৰম সাৰাভাইৰ নামেৰে ৰখা হৈছে।
‘বিক্ৰম-এছʼৰ উৎপাদন কোম্পানীটোৰ মুখ্য কাৰ্যবাহী বিষয়া পৱনকুমাৰ চন্দনাই জনায় যে চলিত মাহৰ আৰম্ভণিতে তেওঁলোকৰ ৰকেট নিৰ্মাণৰ কাম সফলভাৱে সমাপ্ত হৈছে। ১২ৰ পৰা ১৬ নৱেম্বৰৰ ভিতৰত এই উন্মোচন হʼব। ইছৰোৰ এক সূত্ৰৰ মতে, ইঞ্জিনটোৰ কিছু বিশদ পৰীক্ষাৰ বাবে সময়সীমা অলপ পিছুৱাই দিয়া হৈছে। শুকুৰবাৰে এই সফল উৎক্ষেপণৰ কথা টুইটাৰযোগে প্ৰস্তুত কোম্পানীটোৱে ঘোষণা কৰে।
‘বিক্ৰম-এছ’ হৈছে একক পৰ্যায়ৰ উপ-কক্ষপথৰ ৰকেট। এই ৰকেটে বিক্ৰম ছিৰিজৰ অন্যান্য ৰকেটৰ কাৰিকৰী ক্ষমতা পৰীক্ষা কৰাত সহায় কৰিব। উল্লেখ্য, ২০২০ চনত নৰেন্দ্ৰ মোদীৰ চৰকাৰে দেশত মহাকাশ গৱেষণাৰ ব্যাপক সংস্কাৰৰ পথ গ্ৰহণ কৰিছিল। সিদ্ধান্ত লোৱা হৈছে যে কেৱল ইছৰোৱেই নহয়, ব্যক্তিগত কোম্পানীয়েও এইবাৰ ভাৰতত মহাকাশৰ ৰকেট নিৰ্মাণ কৰিব পাৰিব। কৃত্ৰিম উপগ্ৰহ আৰু ইয়াৰ আনুষংগিক সঁজুলি তৈয়াৰ কৰিব পাৰে।
ইছৰোৰ বাহিৰেও দেশৰ মহাকাশ গৱেষণাত ব্যক্তিগত কোম্পানীক জড়িত কৰিবলৈ এটা সুকীয়া সংস্থা গঠনৰ প্ৰস্তাৱো কেইবছৰমান পূৰ্বে কেন্দ্ৰীয় কেবিনেট বৈঠকত অনুমোদন জনোৱা হৈছিল। সংস্থাটোৰ নাম দিয়া হৈছে, ‘ভাৰতীয় ৰাষ্ট্ৰীয় মহাকাশ প্ৰচাৰ আৰু অনুমোদন কেন্দ্ৰ (IN-SPACE)’।
