নেপালত হোৱা দুৰ্যোগৰ (Nepal Flood) পিছত বিহাৰ, উত্তৰ প্ৰদেশ আৰু উত্তৰাখণ্ড (Bihar, Uttar Pradesh, and Uttarakhand)ত সতৰ্কতা বৃদ্ধি (Increase alertness) কৰা হৈছে। ভাৰত-নেপাল সীমান্তত নিয়োজিত সশস্ত্ৰ সীমান্ত বাহিনী (এছএছবি) সাজু। বিহাৰৰ বান পৰিস্থিতিৰ সৈতে মোকাবিলা কৰিবলৈ দুৰ্যোগ সঁহাৰি দলসমূহক সাজু হ’বলৈ কোৱা হৈছে। ৰাষ্ট্ৰীয় দুৰ্যোগ সঁহাৰি বাহিনীও (এনডিআৰএফ) কিছু অঞ্চলত সাজু হৈছে।
বুধবাৰে পুৱা প্ৰায় ৯ বজাত নেপাল-তিব্বত সীমান্তৰ ৰসুৱা অঞ্চলৰ ভোটে কোশী নদীৰ পাৰ ভাঙি যায়। তাৰ লগে লগে বোকামাটিৰ সোঁত নামি আহে। বিধ্বস্ত নেপালত বহু লোক হতাহত হোৱাৰ আশংকা কৰিছে প্ৰশাসনে। বহুতো সন্ধানহীন হৈ আছে। সন্ধানহীন হৈছে এশৰো অধিক ভাৰতীয় পৰ্যটক। শেহতীয়া পৰিস্থিতিত নিৰুদ্দেশ হোৱা লোকসকলৰ বিষয়ে তদন্তৰ বাবে ভাৰতীয় দূতাবাসে দুটা ফোন নম্বৰ মুকলি কৰিছে। সূত্ৰ অনুসৰি, দিল্লীয়ে ক্ষীপ্ৰতাৰে নেপাললৈ সাহায্য সামগ্ৰী প্ৰেৰণৰ প্ৰস্তুতি চলাইছে। একে সময়তে নেপালৰ সীমান্তৱৰ্তী ৰাজ্যসমূহতো সতৰ্কতা অৱলম্বন কৰা হৈছে।
নেপালৰ পৰা বিভিন্ন নদী ভাৰতৰ সীমান্তৰে এই বিহাৰলৈ নামি আহিছে। ইয়াৰ পিছত গংগাত একত্ৰিত হয়। এনে পৰিস্থিতিত নেপালত সংঘটিত দুৰ্যোগৰ পিছত সজাগ হৈ আছে বিহাৰ প্ৰশাসন। ইতিমধ্যে বিহাৰৰ মুখ্যমন্ত্ৰী সম্ৰাট চৌধৰীয়ে এখন উচ্চ পৰ্যায়ৰ বৈঠক অনুষ্ঠিত কৰিছে। তেওঁ সকলো জিলাকে সজাগ হৈ থাকিবলৈ নিৰ্দেশ দিছে। পশ্চিম চম্পাৰণ, পূব চম্পাৰাণ, গোপালগঞ্জ, সাৰণ, মুজাফ্ফৰপুৰ, বৈশালীৰ দৰে জিলাসমূহৰ দুৰ্বল মথাউৰিসমূহৰ ওপৰত অহৰহ সতৰ্কতা অৱলম্বন কৰিবলৈ অনুৰোধ জনাইছে।
ৰাজ্যখনৰ দুৰ্যোগ ব্যৱস্থাপনা বিভাগৰ সম্পাদক সন্তোষ কুমাৰ মালে এএনআইক জনোৱা মতে, বান পৰিস্থিতিৰ সম্ভাৱনাৰ প্ৰতি লক্ষ্য ৰাখি দুৰ্যোগ ব্যৱস্থাপনা দলসমূহক সষ্টম হৈ থাকিবলৈ কোৱা হৈছে। তেওঁ কয়, “বানপীড়িত জিলাসমূহৰ বাবে এলাৰ্ট জাৰি কৰা হৈছে। বেটিয়া, গোপালগঞ্জ আৰু মুজাফ্ফৰপুৰত এনডিআৰএফৰ অতিৰিক্ত দল মোতায়েন কৰা হৈছে। সেই বানপীড়িত অঞ্চলসমূহত ইতিমধ্যে ৰাজ্যৰ দুৰ্যোগ ব্যৱস্থাপনা দল মোতায়েন কৰা হৈছে।”
আনহাতে, এছএছবিয়ে ভাৰত-নেপাল সীমান্তত নিয়োজিত বেটেলিয়নকো সষ্টম হ’বলৈ কৈছে। বাহিনীটোক পৰিস্থিতি নিৰীক্ষণ কৰাৰ লগতে অসামৰিক প্ৰশাসনৰ সৈতে যোগাযোগ বজাই ৰাখিবলৈ কোৱা হৈছে। এছএছবিৰ চৰকাৰী সূত্ৰৰ উদ্ধৃতি দি এএনআয়ে জনোৱা মতে, উত্তৰ প্ৰদেশ আৰু উত্তৰাখণ্ডৰ ঘগ্ৰা, কৰ্ণালী আৰু মহাকালী নদী অৱবাহিকাৰ গাতে লাগি থকা জিলাকেইখনৰ প্ৰতি বিশেষ গুৰুত্ব দিয়া হৈছে। জৰুৰীকালীন অৱস্থাত ৰাজ্য চৰকাৰ আৰু স্থানীয় প্ৰশাসনৰ সৈতে কাম কৰিবলৈ বাহিনীটোক সাজু কৰি ৰখা হৈছে। এছএছবিৰ সূত্ৰ অনুসৰি, ভাৰত-নেপাল সীমান্তত বাহিনীটোৰ ১১টা ‘ৰেচকিউ এণ্ড ৰিলিফ টীম’ সাজু কৰি ৰখা হৈছে। প্ৰয়োজন অনুসৰি আৰু ৭টা দল নিয়োগ কৰিবলৈ সাজু কৰি ৰখা হৈছে।
