প্ৰতি বছৰে বানপানীৰ কৰাল গ্ৰাসত পৰে অসম। কিন্তু এইবাৰ বানপানীৰ ভয়াৱহতা তুলনামূলকভাৱে অধিক। ইতিমধ্যে বানপানীৰ ফলত ১২২ জন লোকৰ প্ৰাণহানি হৈছে। প্ৰায় ২২ লাখ লোক এতিয়াও জলবন্দী হৈ আছে।
ঘৰ-দুৱাৰ, খেতি-মাটি সকলো ধুই নিছে পানীয়ে ৷ তাৰ মাজতে বানে উটুৱাই নিছে এখন চিকিৎসালয়।
বানপানীত ডুব গৈছে যান-বাহনো৷ এনে দুখলগা পৰিস্থিতিৰ মাজতে ৰাস্তাৰ এটা চুকত ওখ ঠাইত চলি আছে কেন্সাৰ ৰোগীৰ বাবে কেমোথেৰাপি!
শিলচৰৰ সমীপৰ কৰ্কট চিকিৎসালয়খন সম্পূৰ্ণৰূপে পানীত ডুব যোৱাৰ ফলত ৰোগীসকলক মুকলি আকাশৰ তললৈ আনি তাতেই কৰ্কট ৰোগৰ চিকিৎসা প্ৰদান কৰা হৈছে৷
প্ৰাপ্ত খবৰ অনুসৰি, বিগত কিছুদিন ধৰি ১৫০খন বিছনাযুক্ত কাছাৰ কৰ্কট চিকিৎসালয় আৰু গৱেষণা কেন্দ্ৰ প্ৰায় সম্পূৰ্ণৰূপে পানীত ডুব গৈছে ৷ পৰিস্থিতিয়ে এনেকুৱা ৰূপ লৈছে যে চিকিৎসালয় কৰ্তৃপক্ষই ৰোগী আৰু চিকিৎসালয়ৰ কৰ্মচাৰীৰ বাবে লাইফ জেকেটৰ ব্যৱস্থা কৰিছে ৷
বৰাক উপত্যকাৰ গাতে লাগি থকা অঞ্চলটো বানপানীৰ ফলত যথেষ্ট ক্ষতিগ্ৰস্ত হৈছে ৷ এগৰাকী চিকিৎসকে জনোৱা মতে; তেওঁলোকে ৰাস্তাতে কেমোথেৰাপিকে ধৰি প্ৰয়োজনীয় চিকিৎসা আৰু পৰীক্ষা-নিৰীক্ষা কৰি আছে। পানী অলপ কম হোৱা ঠাইত ৰোগীসকলক চিকিৎসা কৰা হৈছে।
