ঈদ মানে খুচি। মানৱতা আৰু ভাতৃত্ববোধৰ এক অনন্য উৎসৱ। মাহজোৰা উপবাস আৰু কঠোৰ কৃচ্ছ সাধনাৰ অন্তত ইছলামধৰ্মী লোকসকলৰ বাবে এক আনন্দ উৎসৱ ঈদ-উল-ফিটৰ। পিছে মহামাৰী কৰোনাৰ বাবে বিগত দুটা বছৰত নাছিল কোনো উৎসাহ, আনন্দ৷
ঈদগাহ অথবা মছজিদ আছিল জনশূন্য, সজোৱা হোৱা নাছিল আটকধুনীয়াকৈ৷ এইবাৰ পিছে পৰিস্থিতি উন্নত হৈছে। সেয়ে হৃদয়ে হৃদয়ে আনন্দৰ বতৰা বিলাবলৈ, শান্তি-সম্প্ৰীতি-ভাতৃত্ববোধৰ বাৰ্তা দিবলৈ, চেনেহ এনাজৰীৰে ইজনে সিজনক বান্ধিবলৈ আহিছে ঈদ-উল-ফিটৰ৷ প্ৰতি বছৰে ইছলামিক কেলেণ্ডাৰৰ ৰমজান মাহত এমাহজোৰা ব্ৰত অৰ্থাৎ ৰোজা ৰখাৰ অন্তত এই ঈদ পালন কৰা হয়৷
ঈদগাহ অথবা মছজিদত পঢ়া হয় ঈদৰ সমূহীয়া নামাজ৷ ইছলাম ধৰ্মৰ প্ৰধান দুটা উৎসৱ হৈছে ঈদ-উল-ফিটৰ আৰু ঈদ-উল-আজহা৷ ইয়াৰে ঈদ-উল-ফিটৰক কোৱা হয় আনন্দ আৰু দানৰ উৎসৱ৷
ইছলাম ধর্মৰ কেলেণ্ডাৰ হিজৰিৰ দশম মাহ শাবন। ৰমজানৰ পিছৰ মাহটো হৈছে এই শাবন মাহ৷
ৰমজান মাহত এমাহজোৰা ব্ৰত অৰ্থাৎ ৰোজা ৰখাৰ পিছত শাবন মাহৰ ১ তাৰিখে পালন কৰা হয় ঈদ-উল-ফিটৰ৷ ৰমজান মাহৰ শেষৰ দিনাখন শাবনৰ চান্দ অৰ্থাৎ ন-জোন দেখাৰ পিছতেই পালন কৰা হয় ঈদ-উল-ফিটৰ৷ বিশ্বশান্তি আৰু ভাতৃত্ববোধৰ বাণীৰে বিশ্বৰ লগতে আমাৰ দেশ তথা ৰাজ্যবাসীয়ে পালন কৰে ঈদ-উল-ফিটৰ৷
ঈদ-উল-ফিটৰৰ লগত সাঙোৰ খাই আছে পবিত্ৰ ৰমজানৰ মহত্ব। ৰমজানৰ ৰোজা মানেই হৈছে নিজক সংযমী কৰা। আত্মসংযমৰ জৰিয়তে ৰিপু দমন, মনৰ কলুষতা নিৰ্মূল। ৰমজানৰ দুটা প্ৰধান দিশ হৈছে ফিৎৰা আৰু জাকাত। ফিৎৰা হৈছে এক নিৰ্ধাৰিত পৰিমাণৰ মূল্য, যিখিনি প্ৰতিগৰাকী উপাৰ্জনশীল ব্যক্তিয়ে, কোনো ধাৰ-ঋণত নথকাকৈ, নিজৰ আয়ৰ পৰা সমাজৰ দুখীয়া-দৰিদ্ৰক কৰা দান।
নিৰ্ধাৰিত চৰ্তৰ অন্তৰ্ভুক্ত এটা পৰিয়ালে তেওঁলোকৰ প্ৰতিগৰাকী সদস্যৰ নামত উক্ত পৰিমাণৰ ধন দান কৰিব লাগে। আনহাতে, জাকাত হৈছে এক নিৰ্দিষ্ট দান। এই দান এগৰাকী ব্যক্তিৰ জীৱন ধাৰণতকৈ অতিৰিক্ত ভাবে আহৰণ কৰা সম্পত্তি বা ধনৰ এক নিৰ্দিষ্ট অনুপাতত দুখীয়া ব্যক্তিক দান কৰিব লাগে।
ইয়াৰ দ্বাৰা ঈদৰ দিনটোত যাতে সকলোৱে এমুঠি সুখৰ অন্ন গ্ৰহণ কৰিব পাৰে, ঈদৰ আনন্দ উপভোগ কৰিব পাৰে তাৰে এক ব্যৱস্থা। ইয়াৰ দ্বাৰা এটা কথা ক’ব পাৰি যে সমাজত ভেদাভেদৰ বাতাবৰণ হ্রাসৰ বাবেই ফিৎৰা তথা জাকাতৰ প্ৰৱৰ্তন।
ঈদ হৈছে ভাতৃত্ববোধৰ এক নিদৰ্শন। ঈদৰ নামাজত ধনী-দুখীয়া সকলোৱে কান্ধত কান্ধ মিলাই সমবেত হয়। ইয়াৰ দ্বাৰা সমাজৰ উচ্চ-নীচৰ পাৰ্থক্য আঁতৰোৱাৰ বাণী বিলোৱা হয়। ঈদৰ দিনা আয়োজন কৰা ভিন্ন প্ৰকাৰৰ খাদ্য প্ৰকৰণ উপভোগৰ বাবে সকলোকে আমন্ত্ৰণ জনোৱা হয়। ইজনে সিজনৰ ঘৰলৈ গৈ ঈদৰ সুস্বাদু আহাৰ গ্ৰহণ কৰে।
ইয়াত নাথাকে কোনো ধনী-দুখীয়াৰ ভেদাভেদ, নাথাকে জাতি-বৰ্ণৰ পৰিচয়। বিশ্ব ভাতৃত্ববোধৰ মন্ত্ৰ বিলাবলৈয়ে ঈদৰ এই আয়োজন।
বৰ্তমান সময় বৰ প্ৰত্যাহ্বানমূলক হৈ পৰিছে। বিভিন্ন অশুভ কাৰকে সমাজত ক্ৰিয়া কৰিব লৈছে।
মানুহৰ মাজত সংকীৰ্ণতাৰ দেৱাল সৃষ্টি হৈছে। আশাকৰো এই ঈদৰ বাণীৰেই সকলো অসূয়া-অপ্ৰীতিৰ পৰা আমি মুক্ত হৈ এখন নতুন সমাজ গঠনৰ দিশে অগ্ৰসৰ হ’ব পাৰো। এই ঈদ হওক মনৰ অসুৰবোৰ বধ কৰি মানৱতাৰ জয়গান গোৱাৰ উৎসৱ। আহক আমি সকলোৱে কান্ধত কান্ধ মিলাই এখন সুন্দৰ সমাজ নিৰ্মাণ কৰো। সকলোকে ঈদ-উল-ফিটৰৰ আন্তৰিক শুভেচ্ছা জনালোঁ।
