বিহাৰৰ পাটনাত আৰক্ষীৰ সৈতে ‘এনকাউণ্টাৰ’ত (Bihar Encounter) নিহত হত্যাকাণ্ডৰ তিনি অভিযুক্ত। শুকুৰবাৰে পুৱা এই ঘটনাত আৰক্ষী আৰু তিনিওজন অভিযুক্তই কেইবা মিনিট ধৰি গুলীচালনা কৰে। মুঠ ৪২ ৰাউণ্ড গুলীচালনা কৰা হয়। আৰক্ষীৰ সূত্ৰই দাবী কৰিছে যে গুলীয়াগুলী বন্ধ হোৱাৰ পিছত তিনিওজন অভিযুক্তক আহত অৱস্থাত চিকিৎসালয়লৈ লৈ যোৱা হয়। তাত চিকিৎসকে তেওঁলোকক মৃত ঘোষণা কৰে। বিহাৰৰ পাটনা জিলাৰ গংগাৰ পাৰৰ শ্বেৰপুৰত সংঘটিত হয় এই ‘এনকাউণ্টাৰ’ কাণ্ড। উক্ত এলেকাৰ থানাৰ ভাৰপ্ৰাপ্ত আৰক্ষী বিষয়া ৰজনীশ কুমাৰো আহত হয়। তেওঁৰ বাওঁহাতত গুলী লাগে।
পাটনা আৰক্ষীৰ অন্যতম শীৰ্ষ বিষয়া কাৰ্তিক কুমাৰ শৰ্মাই কয় যে শ্বেৰপুৰত একাংশ অসামাজিক উপাদানে বিশৃংখলতা সৃষ্টি কৰাৰ পৰিকল্পনা কৰা বুলি তথ্য লাভ কৰি বিশেষ টাস্ক ফ’ৰ্চে অপৰাধৰ বিৰুদ্ধে অভিযান আৰম্ভ কৰিছে। তেওঁলোকৰ সৈতে পাটনা আৰক্ষীৰ এটা দল উপস্থিত থাকে। আৰক্ষীৰ দলটোৱে শ্বেৰপুৰ অঞ্চলৰ এটা নিৰ্দিষ্ট স্থান পোৱাৰ লগে লগে অভিযুক্তই গুলীচালনা আৰম্ভ কৰে। আহত হয় মানে থানাৰ এজন আৰক্ষী। ইয়াৰ পিছতে আৰক্ষীয়ে প্ৰত্যুত্তৰ দিয়ে। আৰক্ষীৰ সূত্ৰই দাবী কৰা মতে, তিনিওজন অভিযুক্ত গুৰুতৰভাৱে আহত হোৱাৰ পিছতহে গুলীয়াগুলী বন্ধ হয়। ইয়াৰ পিছত তেওঁলোকক চিকিৎসালয়লৈ লৈ যোৱা হয় আৰু আটাইকেইজনকে চিকিৎসকে মৃত বুলি ঘোষণা কৰে।
পাটনা আৰক্ষীয়ে জনোৱা মতে, অভিযুক্তৰ পৰা দুটা পিষ্টল, এটা দেশত নিৰ্মিত বন্দুক আৰু কেইবাটাও খালী কাৰ্টিজ উদ্ধাৰ কৰা হৈছে। শুকুৰবাৰে পুৱা ঘটনা সন্দৰ্ভত পাটনা আৰক্ষী বিষয়াগৰাকীয়ে কয়, “আৰক্ষীয়ে প্ৰত্যুত্তৰ দিবলৈ আৰম্ভ কৰাৰ পিছত কেইবাজনো লোক আহত হয়। গুলীয়াগুলী বন্ধ হোৱাৰ পিছত আৰক্ষীয়ে আগবাঢ়ি গৈ তিনিজন আঘাতপ্ৰাপ্ত হৈ পৰি থকা প্ৰত্যক্ষ কৰে। পিছত চিকিৎসালয়ত তেওঁলোকক মৃত ঘোষণা কৰে।পৰৱৰ্তী পদক্ষেপ গ্ৰহণ কৰা হৈছে। মৰণোত্তৰ পৰীক্ষাৰ ভিডিঅ’গ্ৰাফী কৰা হ’ব।” আৰক্ষীয়ে লগতে কয় যে গুলীয়াগুলীৰ সময়ত অভিযুক্তই ২৪ জাঁইতকৈ অধিক গুলীচালনা কৰে। আনহাতে, আৰক্ষীয়ে ১৮ জাঁই গুলীচালনা কৰে। আৰক্ষীৰ সূত্ৰ অনুসৰি, তিনিওজন অভিযুক্ত হত্যাৰ গোচৰত জড়িত। দুৰ্গাষ্টমীৰ দিনা সংঘটিত হয় এই হত্যাকাণ্ড। সেই হত্যাকাণ্ডৰ তদন্তত আৰক্ষীয়ে তিনিওজনক বিচাৰি আছিল। ইয়াৰ বাহিৰেও দানাপুৰ আৰু শ্বাহপুৰ অঞ্চলত তিনিওজনৰ বিৰুদ্ধে কেইবাটাও গোচৰ আছে।
