পশ্চিম কাৰ্বি আংলং জিলাত সংঘটিত হৈছে এক নিৰ্মম হত্যাকাণ্ড। জিলাখনৰ জেৰিকিন্দেঙৰ অন্তৰ্গত মুখিম গাঁৱত দুই আত্মীয়ৰ মাজত নিশা সুৰা সেৱনক কেন্দ্ৰ কৰি হোৱা বাক-বিতণ্ডাই ভয়ংকৰ ৰূপ লয়। সুৰাৰ নিচাত খুলশালীয়েকে উৰাল মাৰিৰে মৰিয়াই হত্যা কৰে নিজৰ ভিনিহীয়েকক। এই ঘটনাই সমগ্ৰ অঞ্চলটোতে তীব্ৰ চাঞ্চল্যৰ সৃষ্টি কৰিছে।
জানিব পৰা মতে, নিহত বাবু তেৰণ নামৰ ব্যক্তিজনে দিনৰ ভাগত তেওঁৰ খুলশালীয়েক বিজয় ফাংচʼৰ সৈতে একেলগে কাম কৰিছিল। কিন্তু নিশা দুয়ো একেলগে সুৰা সেৱন কৰিবলৈ বহাৰ সময়তেই দুয়োৰে মাজত কোনো এক কথাক লৈ বিতৰ্কৰ সৃষ্টি হয়। ইয়াৰ পিছত পৰিস্থিতি ক্ৰমাৎ নিয়ন্ত্ৰণৰ বাহিৰলৈ যায়। কাজিয়াৰ মাজতে খঙৰ ভমকত ঘৰত কাঠৰ উৰাল মাৰিৰেৰে বিজয়ে ভিনিহীয়েক বাবু তেৰণক উপৰ্যুপৰি আক্ৰমণ চলায়।
এই আক্ৰমণত গুৰুতৰভাৱে আঘাতপ্ৰাপ্ত হৈ ঘটনাস্থলীতে ঢলি পৰে বাবু তেৰণ। ঘটনাৰ কথা জানিব পাৰি পৰিয়ালৰ লোক আৰু স্থানীয় লোক আহি গুৰুতৰভাৱে আহত অৱস্থাত তেওঁক উদ্ধাৰৰ চেষ্টা চলায় যদিও তীব্ৰ আক্ৰমণৰত তেওঁৰ ঘটনাস্থলীতে মৃত্যু হয়।
ইফালে ঘটনাৰ খবৰ পাই জেৰিকিন্দেং আৰক্ষী থানাৰ আৰক্ষীৰ এটা দল ঘটনাস্থলীত উপস্থিত হৈ পৰিস্থিতি নিয়ন্ত্ৰণ কৰে। আৰক্ষীয়ে মৃতদেহটো উদ্ধাৰ কৰি মৰণোত্তৰ পৰীক্ষাৰ বাবে প্ৰেৰণ কৰাৰ ব্যৱস্থা কৰে। লগতে হত্যাকাৰী বিজয় ফাংচʼক ঘটনাস্থলীৰ পৰাই গ্ৰেপ্তাৰ কৰে। অভিযুক্ত সম্প্ৰতি আৰক্ষীৰ জিম্মাত আছে।
