খ্ৰাম, তুমডিং, পাংছি থগাৰিৰ ধ্বনি আৰু তিৱা লোকগীত-নৃত্যৰে আৰম্ভ হোৱা ১৯ সংখ্যক লাংখন মহোৎসৱৰ শনিবাৰে সামৰণি পৰে। ২৯ অক্টোবৰৰ পৰা ৩১ অক্টোবৰলৈ তিনি দিনীয়া বৰ্ণাঢ্য কাৰ্যসূচীৰে কাৰ্বি আংলঙৰ উলুকুঞ্চিত অনুষ্ঠিত লাংখন উৎসৱৰ অন্তিমদিনাৰ কাৰ্যসূচীত ৰাজ্যৰ মুখ্যমন্ত্ৰী ডঃ হিমন্ত বিশ্ব শৰ্মা উপস্থিত থাকে। উল্লেখ্য যে এয়া হৈছে মুখ্যমন্ত্ৰীৰ প্ৰথম লাংখন ভ্ৰমণ। অনুষ্ঠানত উপস্থিত থাকি মুখ্যমন্ত্ৰীয়ে তিৱা জনগোষ্ঠীৰ পৰম্পৰাৰ শলাগ লয়। তেওঁ কয় যে তিৱা জনগোষ্ঠীৰ শক্তিশালী সমাজিক ব্যৱস্থা থকাৰ বাবে ঐতিহাসিক কালৰে পৰা পাহাৰ-ভৈয়ামত নিজৰ পৰম্পৰা তথা কলা-সংস্কৃতি বজাই ৰাখিব পাৰিছে। মুখ্যমন্ত্ৰীয়ে ভাষণ প্ৰসংগত তিৱাসকলৰ লাংখন উৎসৱ সৰ্বাংগীণ শান্তি আৰু প্ৰগতিৰ প্ৰতীক বুলি উল্লেখ কৰে।
আনহাতে, বৰ্তমানৰ পশ্চিমীয়া সাজপাৰৰ বিপৰীতে আমাৰ নিজস্ব তথা পৰম্পৰাগত সাজ-পোছাক থকাৰ কথা উল্লেখ কৰি যি জাতিয়ে নিজৰ ভাষা, কলা-সংস্কৃতি বজাই ৰাখিব নোৱাৰে সেই জাতিটো সময়ৰ গতিত বিলুপ্ত হৈ পৰে বুলিও কয়। সেয়ে নিজৰ ভাষা-সংস্কৃতি আৰু পৰম্পৰা বজাই ৰাখিবলৈ নৱ-প্ৰজন্মক ইয়াৰ প্ৰতি সন্মান তথা দায়িত্ব গ্ৰহণ কৰিবলৈ আহ্বান জনায় । ইয়াৰ উপৰি তিৱা জনগোষ্ঠীৰ এই লাংখন উৎসৱ অহা বছৰ অসম চৰকাৰৰ বাৰ্ষিক কলেণ্ডাৰত অন্তভুক্ত কৰা হ’ব বুলিও মুখ্যমন্ত্ৰীয়ে ঘোষণ কৰে। লগতে এই উৎসৱ উদযাপনৰ বাবে চৰকাৰী সাহায্য প্ৰদানৰো মুখ্যমন্ত্ৰীয়ে আশ্বাস দিয়ে। এই লাংখন মহোৎসৱৰ অন্তিমদিনাৰ কাৰ্যসূচীত কাৰ্বি স্বায়ত্ত পৰিষদৰ মুখ্য কাৰ্যবাহী সদস্য তুলিৰাম ৰংহাং, সাংসদ অমৰছিং টিছ’, অসম বিধানসভাৰ উপাধ্যক্ষ হাবে টেৰণ উপস্থিত থাকে।
