অসম-নাগালেণ্ড সীমান্তত পুনৰ নগা উগ্ৰপন্থীয়ে সন্ত্ৰাসৰ সৃষ্টি কৰিছে । নগা উগ্ৰপন্থী সংগঠন এনএছচিএন (কে-ইনকি) (NSCN, K-Niki) গোটে অপহৰণ কৰা এজন ব্যৱসায়ীক খটখটি আৰক্ষীয়ে উদ্ধাৰ কৰে। ইয়াৰ সৈতে জড়িত এজন উগ্ৰপন্থীকো আৰক্ষীয়ে আটক কৰে। উল্লেখ্য যে খটখটি আৰক্ষী থানাৰ অন্তৰ্গত বালিজান লামা বস্তিৰ পৰা বুধবাৰে সন্ধিয়া প্ৰায় ৭ বজাত ভিক্টৰ চুব্বা নামৰ ব্যৱসায়ীজনক নগা উগ্ৰপন্থীয়ে অপহৰণ কৰিছিল।
আনহাতে, ব্যৱসায়ীজনক মুক্তিৰ বাবে ৭.৫০ লাখ টকা মুক্তিপণ হিচাপে দাবী কৰিছিল। সাত-আঠজনীয়া অস্ত্ৰধাৰী এনএছচিএনৰ এটা দলে ভিক্টৰ চুব্বাক নিজৰ ঘৰৰ পৰাই অপহৰণ কৰি নিছিল। আৰক্ষীয়ে এই অপহৰণ কাণ্ডৰ সৈতে জড়িত কেভিত’ আয়ে নামৰ এনএছচিএনৰ সদস্যজনক আটক কৰিছে। ইফালে অপহৰণৰ পিছত বেয়াকৈ শাৰীৰিক নিৰ্যাতনৰ সন্মুখীন হোৱা ভিক্টৰ চুব্বাক খটখটিৰ আশা মাল্টিস্পেচিয়েলিটী হস্পিটেলত ভৰ্তি কৰোৱা হৈছে।
