দিল্লীত বিৰোধী ‘ইণ্ডিয়া’ ব্লকৰ (INDIA BLOCK) সাংসদৰ প্ৰতিবাদৰ সময়ত এগৰাকী মহিলা আৰক্ষীক ঠেলিবলৈ চেষ্টা কৰে কংগ্ৰেছ নেতা ৰাহুল গান্ধীয়ে। বুধবাৰে কংগ্ৰেছৰ সাংসদগৰাকীৰ বিৰুদ্ধে এই গুৰুতৰ অভিযোগ উত্থাপন কৰে বিজেপিয়ে। অশোক পথত ধৰ্ণা কাৰ্যসূচীৰ সময়ত যেতিয়া আৰক্ষীয়ে এগৰাকী মহিলা প্ৰতিবাদকাৰীক আঁতৰাবলৈ চেষ্টা কৰিছিল, তেতিয়া যন্তৰ-মন্তৰৰ সমীপত এক উত্তপ্ত পৰিস্থিতিৰ সৃষ্টি হয়। ইয়াৰ পিছত ৰাহুল গান্ধীৰ ((Rahul Gandhi) বিৰুদ্ধে উত্থাপিত অভিযোগ পোহৰলৈ আহে। বিজেপিৰ এই অভিযোগক লৈ এতিয়ালৈকে কংগ্ৰেছৰ কোনো সঁহাৰি পোৱা নাই।
বিৰোধী সাংসদসকলে নিৰ্বাচন আয়ুক্তসকলৰ সৈতে বৈঠকত মিলিত হোৱাৰ দাবীত আঠ ঘণ্টীয়া ধৰ্ণা কাৰ্যসূচী ৰূপায়ণ কৰাৰ মাত্ৰ এদিন পিছতে ‘ভোট চুৰি’ৰ অভিযোগ আৰু মুখ্য নিৰ্বাচন আয়ুক্ত জ্ঞানেশ কুমাৰক অপসাৰণৰ দাবীত উত্তাল হৈ পৰে দিল্লী। বিৰোধী মিত্ৰজোঁট ‘ইণ্ডিয়া’ৰ নেতৃত্বত এই প্ৰতিবাদ।
বিজেপিৰ মুখপাত্ৰ প্ৰদীপ ভাণ্ডাৰীয়ে ছ’চিয়েল মিডিয়া এক্সত এই ঘটনাৰ ভিডিঅ’ ক্লিপ পোষ্ট কৰে। তাত তেওঁ ৰাহুল গান্ধীক তীব্ৰ সমালোচনা কৰে। প্ৰদীপে লিখিছে, “ছ’চিয়েল মিডিয়াত ‘ৰিল’ বনোৱাৰ অত্যধিক আগ্ৰহত ৰাহুল গান্ধীয়ে এগৰাকী মহিলা আৰক্ষী বিষয়াক ঠেলি দিবলৈ চেষ্টা কৰিছিল।”
বিজেপিৰ মুখপাত্ৰ গৌৰৱ ভাটিয়াই অভিযোগ কৰে যে ৰাহুল গান্ধীৰ এই আচৰণ বিৰোধী দলৰ নেতাৰ স্থিতিৰ লগত খাপ নাখায়। ইচ্ছাকৃতভাৱে তেওঁ মহিলা আৰক্ষী বিষয়াগৰাকীক স্পৰ্শ কৰিছিল। গৌৰৱে কয়, “ভিডিঅ’টোত স্পষ্টকৈ দেখা গৈছে যে ৰাহুল গান্ধীয়ে ইচ্ছাকৃতভাৱে আৰু অনুচিতভাৱে মহিলা আৰক্ষী বিষয়াগৰাকীক স্পৰ্শ কৰিছে। যদি সঁচাকৈয়ে এনেকুৱাই হৈছে তেন্তে সেয়া অতি আপত্তিজনক। বিৰোধী দলৰ নেতা হিচাপে ৰাহুল গান্ধীয়ে জনপ্ৰতিনিধি হোৱাৰ ক্ষেত্ৰত কেনেধৰণৰ দায়িত্ব জড়িত হৈ আছে সেই কথা বুজিব লাগে। তেওঁ জনজীৱনৰ মৰ্যাদা ৰক্ষা কৰিব লাগে আৰু মহিলাক সন্মান কৰিব লাগে।” লগতে এই সন্দৰ্ভত কংগ্ৰেছ নেতা ৰাহুল গান্ধীৰ পৰা ক্ষমা বিচৰাৰো দাবী জনায়।
এই ঘটনাক লজ্জাজনক বুলি অভিহিত কৰি বিজেপি নেতা তেজিন্দৰ বাগ্গাই কয় যে কোনো ৰাজনৈতিক স্থিতিয়ে কাকো কোনো মহিলাক অনুচিতভাৱে স্পৰ্শ কৰাৰ অধিকাৰ প্ৰদান নকৰে। তেওঁ কয়, “ৰাহুল গান্ধীয়ে এগৰাকী মহিলা আৰক্ষীক অনুচিতভাৱে স্পৰ্শ কৰাৰ ঘটনাটো লজ্জাজনক। কোনো ৰাজনৈতিক পদবীয়ে কাকো মহিলাক অনুচিতভাৱে স্পৰ্শ কৰাৰ অধিকাৰ নিদিয়ে। তেওঁৰ লজ্জাজনক আচৰণৰ বাবে তেওঁক জবাবদিহি কৰিব লাগিব।” আন কেইবাজনো বিজেপি নেতায়ো তীব্ৰ প্ৰতিক্ৰিয়া প্ৰকাশ কৰে। লগতে কংগ্ৰেছ সাংসদগৰাকীক সমালোচনা কৰি একেধৰণৰ অভিযোগ উত্থাপন কৰে।
উল্লেখ্য যে বুধবাৰে দিল্লীত এক নাটকীয় পৰিস্থিতিৰ সৃষ্টি হয়। আৰক্ষীয়ে বিৰোধী দলৰ সাংসদসকলক প্ৰতিবাদৰ বাবে যন্তৰ-মন্তৰৰ দিশে আগবাঢ়ি যোৱাত বাধা দিয়ে। কংগ্ৰেছৰ সভাপতি মল্লিকাৰ্জুন খাৰ্গেয়ে আয়োজন কৰা সংহতিৰ দুপৰীয়াৰ আহাৰ গ্ৰহণ কৰি সাংসদসকলে যন্তৰ-মন্তৰ অভিমুখে পদযাত্ৰা কৰিব বুলি সিদ্ধান্ত লোৱা হয়। দুপৰীয়াৰ আহাৰ খোৱাৰ পিছত অলপ সময়ৰ ভিতৰতে সাংসদসকলে বাছত উঠি যন্তৰ-মন্তৰলৈ ৰাওনা হয়। সমদল মূল পথৰ পৰা প্ৰতিবাদস্থলীৰ দিশে আগবাঢ়ি যোৱাৰ সময়তে একাংশ নেতাই ত্ৰিৰংগ পতাকা লৈ বাছখনৰ চাদত উঠে। ইয়াৰ ফলত উচ্চ নিৰাপত্তা মণ্ডলত একেৰাহে দ্বিতীয়দিনাও যাতায়াত আৰু স্বাভাৱিক কাৰ্যকলাপ স্তব্ধ হৈ পৰে।
নিৰাপত্তাৰক্ষীয়ে বাছসমূহ ৰখাই দিয়াৰ লগে লগে পৰিস্থিতি উত্তেজিত হৈ পৰে। পিছত আৰক্ষীয়ে বলপূৰ্বকভাৱে ৰাহুল গান্ধী, তেওঁৰ ভগ্নী তথা সাংসদ প্ৰিয়ংকা গান্ধী ভাদ্ৰাৰ লগতে ‘ইণ্ডিয়া’ৰ কেইবাগৰাকীও নেতাক জোৰ কৰি আঁতৰাই নি আটক কৰে।
প্ৰতিবাদত কংগ্ৰেছ, তৃণমূল কংগ্ৰেছ, চিপিআই(এম), চিপিআই, আৰজেডি, আইইউএমএলকে ধৰি কেইবাটাও দলৰ সাংসদসকলে অংশগ্ৰহণ কৰাৰ বিপৰীতে সমাজবাদী পাৰ্টিৰ সাংসদ উপস্থিত নাছিল।
