হিমালয়ৰ (Himalaya) এটা বিশাল হিমবাহ (Huge glacier) ভাঙি নেপালত ভূমিস্খলনৰ সৃষ্টি (Landslide occurrence in Nepal) হৈছে। বোকামাচিৰ খহনীয়াই উটুৱাই লৈ যায় নিম্নভূমি। এজন পৰ্যটকে গম নোপোৱাকৈয়ে এই দুৰ্যোগৰ মুহূৰ্তটো তেওঁৰ কেমেৰাত বন্দী কৰে।
ছ’চিয়েল মিডিয়াত প্ৰচাৰিত এটা ভিডিঅ’ত দেখা গৈছে বগা ডাৱৰে পাহাৰ আবৰি ধৰিছে। ইয়াৰ মাজতে বৰফৰ ধ্বংসাৱশেষ ধোঁৱাৰ ৰূপত বাঢ়িছে । যিহেতু ভিডিঅ’টোৰ সময় আৰু স্থান তিব্বতত সংঘটিত হোৱা দুৰ্যোগৰ সময়ৰ লগত মিল আছে, সেয়েহে বিশেষজ্ঞসকলৰ মতে এয়াই সেই মুহূৰ্ত। চীনৰ জিনজিয়াং স্বায়ত্তশাসিত অঞ্চলৰ জিৰং অঞ্চলত যোৱা ২৬ আগষ্টত হিমালয়ৰ সৌন্দৰ্য বন্দী কৰি ভ্ৰমণ কৰি আছিল এজন পৰ্যটক। সেই সময়তে দুৰ্যোগৰ মুহূৰ্তটো তেওঁৰ কেমেৰাত বন্দী হৈছিল।
চীনা একাডেমী অব ছায়েন্সেছৰ অধীনস্থ ইনষ্টিটিউট অব মাউণ্টেইন হেজাৰ্ডছ এণ্ড এনভাইৰনমেণ্টৰ সঞ্চালক কাং শ্বিচাঙে পৰ্যটকগৰাকীয়ে তোলা ভিডিঅ’টো বিশ্লেষণ কৰে। তেওঁ কয় যে ৰিম’ট ছেন্সিং ইমেজৰীৰ জৰিয়তে হিমবাহটো ভাঙি পৰা ঠাইখন চিনাক্ত কৰা হৈছে, ভিডিঅ’টোত দেখা পোৱা সেই একে ঠাই। ভিডিঅ’টোত থকা ধোঁৱাৰ কুণ্ডলীটো নেপালৰ দিশে হিমবাহ ভাঙি যোৱাৰ বাবে সৃষ্টি হৈছে। চীনৰ সংবাদ মাধ্যমে দাবী কৰিছে যে সমুদ্ৰপৃষ্ঠৰ পৰা ৫১৪০ মিটাৰ উচ্চতাত এই হিমবাহটো ভাঙি গৈছে। প্ৰায় ৬ লাখ ২০ হাজাৰ বৰ্গমিটাৰ এলেকাত বিয়পি পৰিছিল। এই হিমস্খলনৰ ফলত সৃষ্টি হোৱা বৰফ, বোকা আৰু শিলৰ ধ্বংসাৱশেষে পিছৰ সাত মিনিটত পাহাৰৰ ঢালৰ পৰা প্ৰায় ২০ কিলোমিটাৰ নামি গৈ গিৰাং বন্দৰ পায়হি। সেই সময়ত বৰফৰ ধ্বংসাৱশেষ ৫১৪০ মিটাৰ উচ্চতাৰ পৰা ৩৩০০ মিটাৰলৈ নামি আহিছিল।
বুধবাৰে পুৱা এই হিমস্খলনৰ বাবেই নেপালৰ সীমান্তৱৰ্তী ৰসুৱা জিলাৰ ভোটে কোশী নদীত আকস্মিক বান আহে। গাঁৱৰ পিছত গাঁও, ঘৰ, ৰাস্তা, গাড়ী, দলং উটুৱাই লৈ যায়। শনিবাৰে পুৱালৈকে নেপাল আৰক্ষীয়ে ৬১৬ জন লোকৰ মৃত্যুৰ খবৰ দিছে। নিৰুদ্দেশ হৈছে ৩ হাজাৰৰো অধিক লোক। ইয়াৰে বহুতেই ভাৰতীয়। ভাৰতৰ পৰা বহু পৰ্যটক কৈলাস-মানৰোবৰ দৰ্শন কৰিবলৈ নেপাললৈ গৈছিল। ঘটনাৰ দিনটোত ভাৰত চৰকাৰে নেপাললৈ সাহায্যৰ বাৰ্তা প্ৰেৰণ কৰিছিল। কেইবাটাও গোটত তালৈ সাহায্য সামগ্ৰী প্ৰেৰণ কৰা হৈছে। নেপালৰ অনুৰোধত নতুন দিল্লীয়ে প্ৰেৰণ কৰিছে উদ্ধাৰকাৰী দলো।
