শেহতীয়াভাৱে অৰুণাচলত (Arunachal Pradesh) হৈ থকা ধাৰাসাৰ বৰষুণে (Continuous rain) ৰাজ্যখনৰ লগতে অসমলৈও দুৰ্যোগ নমাই আনিছে (Disaster has also struck Assam)। ধাৰাসাৰ বৰষুণৰ লগতে ডাৱৰ বিস্ফোৰণৰ ফলত অৰুণাচলৰ কেইবা ঠাইতো বান আৰু ব্যাপক খহনীয়াৰ সৃষ্টি হৈছে। আনহাতে, অৰুণাচলৰ পানীৰে অসমৰ নদী-উপনদী উপচি পৰাৰ লগতে অসমৰ বিভিন্ন স্থানত হৈ থকা নেৰানেপেৰা বৰষুণৰ ফলত কেইবাখনো জিলাত বান পৰিস্থিতিৰ সৃষ্টি হৈছে। ফলত অসম চৰকাৰে এই পৰিস্থিতিক গুৰুত্বসহকাৰে লৈছে।
গুৱাহাটী আৰু ইটানগৰস্থিত আঞ্চলিক বতৰ বিজ্ঞান কেন্দ্ৰৰ প্ৰদান কৰা তথ্য অনুসৰি, অৰুণাচলৰ নামনি সোৱণশিৰি জিলাৰ ইয়াজালিত বিগত ২৪ ঘণ্টাত প্ৰায় ৭২.৮ মিলিমিটাৰ বৰষুণ হোৱাৰ লগতে বুধবাৰেও হোৱা ধাৰাসাৰ বৰষুণৰ ফলত বহু অঞ্চল বানত ডুব গৈছে।
এই পৰিস্থিতিৰ প্ৰতি লক্ষ্য ৰাখি অসমৰ বিভিন্ন জিলাত ব্ৰহ্মপুত্ৰ আৰু ইয়াৰ উপনৈসমূহৰ জলস্তৰ বৃদ্ধি পোৱাৰ সম্ভাৱনাই দেখা দিছে। ইয়াৰে ভিতৰত ধেমাজি, লখিমপুৰ, বিশ্বনাথ, শোণিতপুৰ, ধুবুৰী আদি জিলাত জলস্তৰ বৃদ্ধি পোৱাৰ লগতে জিলাকেইখন বানৰ দ্বাৰা প্ৰভাৱিত হোৱাৰ আশংকা কৰি ৰাজ্য চৰকাৰে পৰিস্থিতি নিৰীক্ষণৰ ব্যৱস্থা কৰিছে। আনহাতে, মুখ্যমন্ত্ৰী হিমন্ত বিশ্ব শৰ্মাই অহৰহ পৰিস্থিতি নিৰীক্ষণৰ বাবে মুখ্য সচিবলৈ নিৰ্দেশনা জাৰি কৰিছে। এই নিৰ্দেশনাৰ পিছত মুখ্য সচিবে সংশ্লিষ্ট সকলো কৰ্তৃপক্ষৰ সৈতে সমন্বয় ৰক্ষা কৰি সতৰ্কতামূলক সকলো প্ৰস্তুতি গ্ৰহণ কৰিবলৈ নিৰ্দেশ দিছে।
ৰাজ্য চৰকাৰৰ তৰফৰ পৰা জাৰি কৰা এক প্ৰেছ বিজ্ঞপ্তিত সম্ভাৱ্য ক্ষতিগ্ৰস্ত জিলাসমূহৰ প্ৰশাসন আৰু বিভাগসমূহক সতৰ্ক হৈ থাকিবলৈ নিৰ্দেশ দিয়া হৈছে। লগতে সময়মতে প্ৰতিৰোধমূলক আৰু সাহায্য ব্যৱস্থা গ্ৰহণ কৰিবলৈও কোৱা হৈছে। আনহাতে, এছডিআৰএফ, এনডিআৰএফ আৰু অন্যান্য জৰুৰীকালীন দলসমূহক প্ৰয়োজনসাপেক্ষে নিয়োগ কৰিবলৈ সাজু কৰি ৰখা হৈছে। নৈপৰীয়া আৰু বিপদসংকুল অঞ্চলবোৰক তীব্ৰ নিৰীক্ষণত ৰাখিবলৈ আৰু অঞ্চলবোৰৰ ৰাইজক সতৰ্ক হৈ থকাৰ বাবে সংশ্লিষ্ট জিলা প্ৰশাসনসমূহে আহ্বান জনাইছে।
