বুধবাৰে ঘোষণা (Announcement) হয় চিবিএছচি (CBSE)ৰ ২০২৫-২৬ শৈক্ষিক বৰ্ষৰ দ্বাদশ শ্ৰেণীৰ পৰীক্ষাৰ ফলাফল। অৱশ্যে এইবাৰ উত্তীৰ্ণৰ হাৰ যোৱাবাৰতকৈ কম। এইবাৰ উত্তীৰ্ণৰ হাৰ ৮৫.২০ শতাংশৰ বিপৰীতে যোৱা বছৰ আছিল ৮৮.৩৯ শতাংশ। ছাত্ৰ-ছাত্ৰীসকলে নিজৰ ৰোল নম্বৰ, স্কুল নম্বৰ আৰু এডমিট কাৰ্ডৰ সবিশেষ ব্যৱহাৰ কৰি অফিচিয়েল ৱেবছাইট: results.cbse.nic.in, cbseresults.nic.in, cbse.gov.in আৰু DigiLocker-ৰ জৰিয়তে নিজৰ পৰীক্ষাৰ ফলাফল লাভ কৰিব পাৰে। এইবাৰৰ পৰীক্ষাত মুঠ ১৮,৫৭,৫১৭ গৰাকী ছাত্ৰ-ছাত্ৰীয়ে পঞ্জীয়ন কৰাৰ বিপৰীতে ১৭,৬৮,৯৬৮ গৰাকী পৰীক্ষাত অৱতীৰ্ণ হৈছিল।
ইয়াৰে ভিতৰত ১৫,০৭,১০৯ গৰাকী উত্তীৰ্ণ হয়। মুঠ ১২০টা বিষয়ৰ ওপৰত ৭৫৭৩টা কেন্দ্ৰত অনুষ্ঠিত এই পৰীক্ষা ১৭ ফেব্ৰুৱাৰীৰ পৰা ১০ এপ্ৰিললৈকে অনুষ্ঠিত হৈছিল। উত্তীৰ্ণৰ হাৰৰ ক্ষেত্ৰত এইবাৰো ছাত্ৰীৰ ফলাফল ভাল। মুঠ ৮৮.৮৬ শতাংশ ছাত্ৰী উত্তীৰ্ণ হোৱাৰ বিপৰীতে ছাত্ৰৰ উত্তীৰ্ণৰ হাৰ হৈছে ৮২.১৩ শতাং। আনহাতে, তৃতীয় লিংগৰ উত্তীৰ্ণৰ হাৰ ১০০ শতাংশ। এইবাৰৰ পৰীক্ষাত ৯৪,০০০তকৈ অধিক ছাত্ৰ-ছাত্ৰীয়ে ৯০ শতাংশৰ ওপৰত আৰু ১৭,০০০তকৈ অধিক পৰীক্ষাৰ্থীয়ে ৯৫ শতাংশৰ ওপৰত নম্বৰ লাভ কৰে। মণ্ডল হিচাপে উত্তীৰ্ণৰ সৰ্বাধিক হাৰ ত্ৰিবান্দ্ৰম (৯৫.৬২ শতাংশ)। দ্বিতীয় স্থানত চেন্নাই (৯৩.৮৪) আৰু তৃতীয় স্থানত বেংগালুৰু (৯৩.১৯) । উত্তীৰ্ণৰ সৰ্বনিম্ন হাৰ প্ৰয়াগৰাজত (৭২.৪৩)।
