ইণ্ডিগ’ৰ (IndiGo) এখন বিমানৰ ইঞ্জিন মাজ আকাশত বিকল হৈ পৰাত দিল্লী বিমানবন্দৰ (Delhi airport)ত জৰুৰীকালীন অৱতৰণ (Emergency landing) কৰিবলৈ বাধ্য হয়। ইণ্ডিগ’ বিমানখনৰ পাইলটে যান্ত্ৰিক বিজুতি ধৰা পৰাৰ পিছত জৰুৰীকালীন অৱতৰণৰ অনুমতি বিচাৰে। এই বাৰ্তা লাভ কৰাৰ লগে লগে দিল্লী বিমানবন্দৰত সম্পূৰ্ণ জৰুৰীকালীন অৱস্থা ঘোষণা কৰা হয়। বিমানখন অৱতৰণ কৰাৰ পূৰ্বে সকলো ব্যৱস্থা কৰা হয়।
অৱশ্যে পাইলটে নিৰাপদে বিমানখন অৱতৰণ কৰে। জানিব পৰা মতে, শনিবাৰে পুৱা ইণ্ডিগ’ বিমানখনে অন্ধ্ৰপ্ৰদেশৰ বিশাখাপট্টনমৰ পৰা ১৬১ জন যাত্ৰী লৈ উৰা মাৰিছিল। পুৱা ১০.৫৩ বজাত দিল্লীত অৱতৰণ কৰাৰ কথা আছিল। সূত্ৰ অনুসৰি, বিমানখনৰ ইঞ্জিনত দিল্লীত অৱতৰণ কৰাৰ পূৰ্বে এটা সমস্যাৰ সৃষ্টি হয়। লগে লগে পাইলটজনে দিল্লী এয়াৰ ট্ৰেফিক কণ্ট্ৰ’লৰ (এটিচি) সৈতে যোগাযোগ কৰে। বিমানবন্দৰৰ ২৮ নং ৰাণৱেত হাই এলাৰ্ট জাৰি কৰা হয়। বিমানবন্দৰত জৰুৰীকালীন অৱস্থা ঘোষণা কৰা হয়।
অগ্নিনিৰ্বাপক বাহিনীৰ পৰা আৰম্ভ কৰি সকলো নিৰাপত্তা ব্যৱস্থা প্ৰস্তুত কৰে বিমানবন্দৰ কৰ্তৃপক্ষই। অগ্নিনিৰ্বাপক বাহিনী, এম্বুলেন্স সকলো সাজু কৰি ৰখা হয় যাতে কোনো অপ্ৰীতিকৰ ঘটনা সংঘটিত হ’লে তৎক্ষণাত প্ৰয়োজনীয় পদক্ষেপ গ্ৰহণ কৰিব পৰা যায়। প্ৰথম অৱস্থাত জানিব পৰা মতে, বিমানখন নিৰাপদে অৱতৰণ কৰাৰ পিছত সকলো যাত্ৰীক তাৰ পৰা উলিয়াই অনা হয়। বিমানবন্দৰ কৰ্তৃপক্ষই জনাইছে যে তেওঁলোক সকলো সুৰক্ষিত। বিমান সংস্থাৰ সূত্ৰ অনুসৰি, বিমানখনত হোৱা সমস্যাৰ তদন্ত চলি আছে।
উল্লেখ্য যে যোৱা মাহতো স্পাইচজেটৰ এখন বিমান দিল্লী বিমানবন্দৰত জৰুৰীকালীন অৱস্থা ঘোষণা কৰি অৱতৰণ কৰিবলৈ বাধ্য হৈছিল। দিল্লীৰ পৰা লেহলৈ গৈ আছিল বিমানখন। কিন্তু উৰণৰ কিছু সময়ৰ পাছতে বিমানখনৰ ইঞ্জিনত বিঘিনি ধৰা পৰে। লগে লগে বিমানখন ঘূৰাই আনি পুনৰ দিল্লী বিমানবন্দৰত অৱতৰণ কৰে। বিমানখনত ১৫০ জন যাত্ৰী আছিল।
