আজিকালি মানুহ বিভিন্ন অ’টিটি প্লেটফৰ্ম (OTT platform) বা অনলাইন সমলৰ প্ৰতি আকৰ্ষিত হৈছে। ইয়াৰ সুযোগ লৈ কেইবাটাও অ’টিটি প্লেটফৰ্মে বজাৰত বিভিন্ন অশ্লীল ৱেব ছিৰিজ (Pornographic web series) প্ৰচাৰ কৰি আছে। যিটো কেন্দ্ৰীয় চৰকাৰৰ বাবে ডাঙৰ মূৰৰ কামোৰণি হৈ পৰিছে। এতিয়া কেন্দ্ৰই ইয়াৰ বিৰুদ্ধে কঠোৰ ব্যৱস্থা গ্ৰহণ কৰা আৰম্ভ কৰিছে। তথ্য আৰু সম্প্ৰচাৰ মন্ত্ৰালয়ে (Ministry of Information and Broadcasting) অশ্লীল সমল দেখুওৱাৰ বাবে পাঁচটা অ’টিটি এপ নিষিদ্ধ (5 No OTT platform Ban) কৰিছে।
ইয়াৰ পূৰ্বে ২০২৫ চনৰ জুলাইত কেন্দ্ৰই একেধৰণৰ পদক্ষেপ গ্ৰহণ কৰিছিল। ২৫টা অ’টিটি প্লেটফৰ্ম নিষিদ্ধ কৰা হৈছিল। কেন্দ্ৰীয় চৰকাৰে কৈছে যে অ’টিটি প্লেটফৰ্মবোৰো আইনৰ আওতালৈ অনা হ’ব। কঠোৰ নিৰীক্ষণ কৰা হ’ব যাতে তেওঁলোকে আইনৰ বিৰুদ্ধে কোনো সমল প্ৰকাশ নকৰে আৰু বয়স অনুসৰি সমলৰ শ্ৰেণীবিভাজন কৰে। তথ্য আৰু সম্প্ৰচাৰ মন্ত্ৰালয়ে দেশৰ সকলো ছ’চিয়েল মিডিয়া চেনেল আৰু অ’টিটি প্লেটফৰ্মলৈ সতৰ্কবাণী জাৰি কৰিছে। তথ্য প্ৰযুক্তি আইন, ২০২১-ত সন্নিবিষ্ট নৈতিকতাৰ সংহিতা আখৰে আখৰে মানি চলিবলৈ নিৰ্দেশ দিয়া হৈছে। শিশুসকলে যিকোনো প্ৰকাৰে প্ৰাপ্তবয়স্কৰ সমল চোৱাৰ পৰা বাধা দিবলৈ ‘মূল্যাংকিত সমলৰ বাবে প্ৰৱেশাধিকাৰ নিয়ন্ত্ৰণ’ৰ ব্যৱহাৰৰ বাবে নিৰ্দেশনাৱলী জাৰী কৰা হৈছে।
