শুকুৰবাৰে ঘোষণা হ’ল হাইস্কুল শিক্ষান্ত পৰীক্ষাৰ ফলাফল (HSLC Exam) । অসম ৰাজ্যিক বিদ্যালয় শিক্ষা পৰিষদে নিৰ্ধাৰণ কৰা বিভিন্ন ৱেবছাইটত পুৱা ১০.৩০ বজাত ফলাফল প্ৰকাশ পায়।
শীৰ্ষ ৩ টা স্থান ফলাফলত এইবাৰ নিৰ্ধাৰণ কৰা ‘অৰ্ডাৰ অৱ মেৰিট’ৰ অসমৰ ভিতৰত শীৰ্ষ ৩ টা স্থান দখল যোৰহাটৰ প্ৰজ্ঞা একাডেমী ছিনিয়ৰ ছেকেণ্ডাৰী স্কুল (২টা) আৰু অসম জাতীয় বিদ্যালয়, নুনমাটিৰ। প্ৰথম স্থানত মুঠ ৫৯১ নম্বৰেৰে (৯৮.৫ শতাংশ) উজলিল প্ৰজ্ঞা একাডেমী ছিনিয়ৰ ছেকেণ্ডাৰীৰ আমিশী শইকীয়া।
একেখন বিদ্যালয়ৰে ছাত্ৰ অনিৰ্বাণ বৰগোহাঁয়ে ৫৮৯ নম্বৰ (৯৮.১৭ শতাংশ) লাভ কৰি তৃতীয় স্থান দখল কৰে। আনহাতে, নুনমাটিৰ অসম জাতীয় বিদ্যালয়ৰ শিক্ষাৰ্থী সপ্তৰ্ষ বৰদলৈয়ে ৫৯০ নম্বৰ (৯৮.৩৩ শতাংশ) লাভ কৰি দ্বিতীয় স্থান লাভ কৰে।
প্ৰথমবাৰৰ বাবে অসম ৰাজ্যিক বিদ্যালয় শিক্ষা পৰিষদে অনুষ্ঠিত কৰা হাইস্কুল শিক্ষান্ত পৰীক্ষাৰ উত্তীৰ্ণৰ হাৰ হৈছে ৬৩.৯৮ শতাংশ। পৰীক্ষাত অৱতীৰ্ণ মুঠ ৪,২২,৭৩৭ গৰাকী শিক্ষাৰ্থীৰ ভিতৰত ২,৭০,৪৭১ গৰাকী শিক্ষাৰ্থী উত্তীৰ্ণ হৈছে। আনহাতে, ছাত্ৰৰ উত্তীৰ্ণৰ হাৰ ৬৭.৫৯ শতাংশৰ বিপৰীতে ছাত্ৰীৰ উত্তীৰ্ণ হাৰ ৬১.০৯ শতাংশ।
ইয়াৰে ভিতৰত প্ৰথম বিভাগত ৮৯,০৪১ গৰাকী শিক্ষাৰ্থী উত্তীৰ্ণ হোৱাৰ লগতে ৫,৩৩৬ গৰাকীয়ে ডিষ্টিংছন আৰু ১৬,৫১৭ গৰাকীয়ে ষ্টাৰ মাৰ্ক লাভ কৰিছে। ইয়াৰ উপৰিও বিভিন্ন বিষয়ত লেটাৰ মাৰ্ক লাভ কৰা শিক্ষাৰ্থীৰ সংখ্যা হৈছে ১,৬৮,৩১২ গৰাকী। আনহাতে, দ্বিতীয় বিভাগত ১,৩৫,৫৬৮ গৰাকী আৰু তৃতীয় বিভাগত ৪৫, ৮৬২ গৰাকী উত্তীৰ্ণ হৈছে।
জিলা হিচাপত ৮৫.৫৫ শতাংশ উত্তীৰ্ণৰে ৰাজ্যৰ ভিতৰত শীৰ্ষ স্থান লাভ কৰিছে শিৱসাগৰ জিলাই। দ্বিতীয় স্থানত ডিব্ৰুগড় (৮১.১০) আৰু তৃতীয় স্থানত আছে ধেমাজি জিলা (৮০.৬৪)। শ্ৰীভূমি জিলাৰ উত্তীৰ্ণ হাৰ সৰ্বনিম্ন (৪৭.৯৬)।
