অসম বিধানসভাৰ চলিত শৰৎকালীন অধিবেশনত ৪ খন জিলাত মণিপুৰী ভাষাক (Manipuri language) সহযোগী ভাষা হিচাপে স্বীকৃতি প্ৰদান। বৃহস্পতিবাৰে অসম বিধানসভাত এই সম্পৰ্কীয় এখন বিধেয়ক গৃহীত কৰা হয়। বৰাকৰ ৩ খন জিলাৰ লগতে হোজাইত মণিপুৰী ভাষাক সহযোগী চৰকাৰী ভাষা হিচাপে স্বীকৃতি প্ৰদান কৰা হৈছে।
উল্লেখ্য, ২২ আগষ্টত বিধানসভাত মন্ত্ৰী পীযুষ হাজৰীকাই অসম চৰকাৰী ভাষা (সংশোধনী) বিধেয়ক, ২০২৪ উত্থাপন কৰিছিল। মুখ্যমন্ত্ৰীৰ হৈ উত্থাপন কৰা এই বিধেয়কৰ বিষয়বস্তু বৰ্তমান গৃহ আৰু ৰাজনৈতিক বিভাগৰ অধীনত আছে। আনহাতে, বিধেয়কখন সন্দৰ্ভত আলোচনাত অংশগ্ৰহণ কৰি মুখ্যমন্ত্ৰীয়ে কয়, “মণিপুৰী ৰাইজে এই মৰ্যাদা প্ৰদানৰ বাবে দীৰ্ঘদিন ধৰি দাবী কৰি আহিছে। সেয়ে আজিৰ এই দিনটো এক ঐতিহাসিক দিন।”
উল্লেখ্য যে কাছাৰ, কৰিমগঞ্জ, হাইলাকান্দি আৰু হোজাইত অনুসূচী-২ত নিৰ্ধাৰিত সকলো বা যিকোনো চৰকাৰী উদ্দেশ্যৰ বাবে সহযোগী চৰকাৰী ভাষা হিচাপে মণিপুৰী ভাষা ব্যৱহাৰৰ অনুমতি প্ৰদান কৰিব বুলি মুখ্যমন্ত্ৰীয়ে লগতে উল্লেখ কৰে। এই বিধেয়কখনত মণিপুৰী ভাষাক চাৰি জিলাত স্বীকৃতি দিবলৈ অসম চৰকাৰী ভাষা আইন, ১৯৬০ত এটা নতুন ধাৰা ৫বি অন্তৰ্ভুক্ত কৰাৰ প্ৰস্তাৱ দিয়া হৈছে।
