যোৱা কেইদিনত সংবাদ মাধ্যমত ধাৰাবাহিকভাৱে প্ৰচাৰিত হৈ আছে ৩৭ নম্বৰ ৰাষ্ট্ৰীয় ঘাইপথৰ ওপৰত থকা বোকাখাতৰ ডাক দলঙৰ (Daak Bridge of Bokakhat) কথা। উল্লেখযোগ্য যে ২০২২ চনৰ ১০ আগষ্টতে পাহাৰীয়া ঢলে বিধ্বস্ত কৰিছিল দলংখনৰ সংলগ্ন মাটিৰ ঢাপ। কিন্তু বিধ্বস্ত দলংখন (damaged bridge) যোৱা এটা বছৰত ৰাষ্ট্ৰীয় ঘাইপথ প্ৰাধিকৰণ আৰু লোক নিৰ্মান বিভাগে মেৰামতিৰ বাবে সময় উলিয়াব নোৱাৰিলে। যোৱা কেইদিনত হোৱা নেৰানেপেৰা বৰষুণে অধিক বিপদাপন্ন কৰি তুলিলে দলংখন।
এই বাতৰিও সম্প্ৰচাৰ হ’ল ধাৰাবাহিকভাৱে। বিভাগে বাহৰ বেৰিকেড দি, ৰঙা পতাকা উৰুৱাই সাৰিলে দায়িত্ব।২১ জুনত বোকাখাতৰ বিধায়ক, জ্যেষ্ঠ মন্ত্ৰী অতুল বৰাই দলংখনৰ অৱস্থা দেখি তাৎক্ষণিকভাৱে মেৰামতিৰ নিৰ্দেশ দিছিল। কিন্তু মন্ত্ৰীৰ এই নিৰ্দেশক কেৰেপ নকৰিলে বিভাগে। মেৰামতিৰ নামত পুনৰ খান্দি পেলোৱা হ’ল দলঙৰ তলৰ মাটি। বন্ধ কৰি দিয়াৰ চেষ্টা কৰা হ’ল বোৱতী জলাধাৰ।
আজিও দেখা গ’ল দলংখনৰ দক্ষিণ ফালৰ পূৱ অংশ মূল পথৰ পৰা বিছিন্ন হৈ বিপজ্জনকভাৱে ওলমি আছে। বিভাগীয় সূত্ৰ অনুসৰি এই দলংখনৰ ওপৰেদি দৈনিক পাৰাপাৰ হয় ১৭ হাজাৰ যান বাহন।
ইয়াৰে ৩০ শতাংশ গধুৰ যানবাহন নামনি অসমৰ গুৱাহাটী, কলিয়াভোমোৰা দলং হৈ কলিয়াবৰেদি উজনীলৈ অহা, উজনীৰ ৩৯ নম্বৰ ৰাষ্ট্ৰীয় পথেদি নাগালেণ্ড, মনিপুৰৰ সকলো যান বাহন, ধোদৰ আলিয়েদি অহা যানবাহন, ৩৭ নম্বৰ ৰাষ্ট্ৰীয় পথেদি অৰুণাচল, তিনিচুকীয়া, ডিব্ৰুগড়, যোৰহাট আদিৰপৰা অহা সকলো যানবাহন পাৰ হয় এই দলঙৰ ওপৰেদি। এনে এখন গুৰুত্বপূৰ্ণ দলং মেৰামতিৰ বাবে এনে আওকণীয়া মনোভাৱ কিয় লৈছে সিও ৰহস্যৰ বিষয়।
