এইবাৰ উচ্চতম ন্যায়ালয়ে (Supreme Court) গোচৰটো ৫জন ন্যায়াধীশৰ সাংবিধানিক বিচাৰপীঠলৈ প্ৰেৰণ কৰে। ১৮ এপ্ৰিলত ৫জনীয়া ন্যায়াধীশৰ সাংবিধানিক বিচাৰপীঠত শুনানি গ্ৰহণ কৰা হʼব এই গোচৰৰ। সোমবাৰে আদালতে এই গোচৰটোক মৌলিক গুৰুত্বৰ বিষয় বুলি অভিহিত কৰে।
ভাৰতত সমলিংগ বিবাহক (Same-sex marriage in India) আইনী স্বীকৃতি বিচাৰি উচ্চতম ন্যায়ালয়ত আবেদনৰ এটা গোট দাখিল কৰা হৈছে। এই সন্দৰ্ভত কেন্দ্ৰীয় চৰকাৰৰ মতামত জানিব বিচাৰিছিল আদালতে। শেহতীয়াকৈ কেন্দ্ৰৰ হৈ এক শপতনামাৰ জৰিয়তে সমলিংগ বিবাহক লৈ আপত্তি প্ৰকাশ কৰিছে কেন্দ্ৰই। ইয়াৰ পিছতে মুখ্য ন্যায়াধীশ ডি ৱাই চন্দ্ৰচুড়ৰ নেতৃত্বত উচ্চতম ন্যায়ালয়ে গোচৰটো ৫জনীয়া সংবিধান বিচাৰপীঠলৈ প্ৰেৰণ কৰে। আদালতে কয়, এই সন্দৰ্ভত যিয়েই সিদ্ধান্ত লোৱা হয়, সমাজত ইয়াৰ ডাঙৰ প্ৰভাৱ পৰিব।
সমকামিতা সন্দৰ্ভত উচ্চতম ন্যায়ালয়ে বিগত সময়ত যুগান্তকাৰী ৰায় দি আহিছে। সেয়া ২০১৮ চনৰ কথা। ভাৰতত সমকামিতা অপৰাধ নহয়- উচ্চতম ন্যায়ালয়ৰ এই ৰায়দানে ‘এলজিবিটিকিউ’ সম্প্ৰদায়ৰ জনসাধাৰণৰ দীৰ্ঘদিনীয়া দাবী পূৰণ কৰিলে। এই ৰায়দানৰ পিছত বহুতৰ ধাৰণা যে এই দেশৰ সমকামী লোকসকল অতিশয় ‘স্বাধীন’ হৈ পৰিছে।
আনকি, একাংশ লোকে ভাবে যে সমাজত থকা ভুল ধাৰণাবোৰ বহুখিনি আঁতৰাই পেলোৱা হৈছে। আকৌ সমাজত তথাকথিত সমকামীসকলৰ গ্ৰহণযোগ্যতাও বহুত বাঢ়িছে। ২০১৮ চনৰ সেই ৰায়দানৰ পিছত ভাৰতত সমলিংগ বিবাহক আইনী স্বীকৃতিৰ দাবী অধিক শক্তিশালী হৈ উঠিছিল। আনকি, দেশৰ শীর্ষ ন্যায়ালয়ৰ ঐতিহাসিক ৰায়ৰ পাছত দেশত সমলিংগ বিবাহ সংঘটিত হৈছে৷ কলকাতা, হায়দৰাবাদকে ধৰি দেশৰ বিভিন্ন চহৰত এনেধৰণৰ বিবাহৰ খবৰ শিৰোনামলৈ আহিছে।
২০১৮ চনত উচ্চতম ন্যায়ালয়ে সমকামিতাৰ ৰায়দানৰ পিছত সমলিংগ বিবাহক আইনী স্বীকৃতিৰ দাবী তীব্ৰতৰ হৈ পৰে। যদিও কেন্দ্ৰই ইয়াৰ ওপৰত আপত্তি কৰিছে। কেন্দ্ৰৰ মতে এনে বিবাহ ভাৰতীয় পাৰিবাৰিক সংস্কৃতিৰ লগত সামঞ্জস্যপূৰ্ণ নহয়।
