দেশত প্ৰতি চাৰিটা কিশোৰী যৌন নিৰ্যাতনৰ অভিযোগৰ আঁৰত আছে এক প্ৰেমজনিত সম্পৰ্ক। যʼত দেখা যায় যে অভিযুক্তৰ ভুক্তভোগী নাবালিকাৰ সৈতে প্ৰেমৰ সম্পৰ্ক আছিল। আৰু এনে POCSO গোচৰত বংগ, অসম আৰু মহাৰাষ্ট্ৰ আগবাঢ়ি আছে।
ইউনিচেফ-ইণ্ডিয়া আৰু এনফোল্ড প্ৰোএক্টিভ হেল্থ ট্ৰাষ্টৰ যৌথ অধ্যয়নে এইদৰে কয়। এই সমীক্ষাক লৈ উদ্বেগ প্ৰকাশ কৰে উচ্চতম ন্যায়ালয়ৰ মুখ্য ন্যায়াধীশ ডি ৱাই চন্দ্ৰচুৰে। আনুষংগিক অধ্যয়ন অনুসৰি, POCSO ৰ ৪৬.৬ শতাংশ গোচৰত এনে প্ৰেমজনিত সম্পৰ্কৰ প্ৰমাণ পোৱা গৈছে, ভুক্তভোগীৰ বয়স ১৬ৰ পৰা ১৮ বছৰৰ ভিতৰত আছিল।
মুখ্য ন্যায়াধীশগৰাকীয়ে কয় যে এই গোচৰসমূহৰ বিচাৰত ন্যায়াধীশসকলে যথেষ্ট অসুবিধাৰ সন্মুখীন হʼবলগীয়া হয়। তেওঁ কয় যে তাৰ পৰাই অপৰাধমূলক গোচৰৰ সম্পৰ্কৰ তদন্ত আৰু গোচৰ চলোৱাটো অতি কঠিন হৈ পৰে। ২০১৬ চনৰ পৰা ২০২০ চনলৈকে মুঠ ৭,০৬৪টা POCSO গোচৰৰ বিচাৰ কৰা হৈছে।
সেই গোচৰসমূহ পুনৰীক্ষণ কৰি নিৰীক্ষক স্বাগথা ৰাহা আৰু শ্ৰুতি ৰামকৃষ্ণনে দেখুৱাইছে যে ১৭১৫টা গোচৰত ভুক্তভোগী আৰু অভিযুক্তৰ মাজত গভীৰ সম্পৰ্ক আছিল। সেই গোচৰৰ অধিকাংশই তিনিখন ৰাজ্যৰ পৰা আহিছিল— পশ্চিমবংগ, মহাৰাষ্ট্ৰ আৰু অসম।
১০ ডিচেম্বৰত প্ৰকাশ পাইছিল এই সমীক্ষা। ইয়াৰ উপৰি ৮৭.৯ শতাংশ গোচৰত ভুক্তভোগীয়ে অভিযুক্তৰ সৈতে প্ৰেমৰ সম্পৰ্ক থকা বুলি স্বীকাৰ কৰিছিল।
আকৌ বহু ক্ষেত্ৰত দেখা যায়, নাবালিকাৰ সম্পৰ্ক থকাত পৰিয়ালৰ লোকে এই কথা গম পাই তেওঁক বিয়া হ’বলৈ বাধ্য কৰাইছিল। আৰু তাত যৌন নিৰ্যাতনৰ অভিযোগ আনিছে নাবালিকাই। সমালোচকসকলে দাবী কৰে যে দেশখনে ১৮ বছৰৰ তলৰ নাবালিকাৰ সন্মতিসূচক যৌন কাৰ্যক স্বীকৃতি নিদিলেও এনে গোচৰত আদালতে নম্ৰ দৃষ্টিভংগী গ্ৰহণ কৰে।
এই অধ্যয়ন সন্দৰ্ভত উচ্চতম ন্যায়ালয়ৰ মুখ্য ন্যায়াধীশে কয় যে ১৮ বছৰৰ তলৰ শিশুৰ বাবে যিকোনো যৌন কাৰ্য্যকলাপ অপৰাধ। কিন্তু দুই নাবালকৰ এনে সম্পৰ্কৰ পিছত যেতিয়া গোচৰটো আদালতত উপস্থিত হয় তেতিয়া ন্যায়াধীশসকলে ইয়াৰ বিচাৰত বহু সমস্যাৰ সন্মুখীন হʼবলগীয়া হয়।
