মেঘালয়ৰ ৰাজধানী শ্বিলঙৰ এটা শ্বপিং কমপ্লেক্সত সংঘটিত ভয়ংকৰ অগ্নিকাণ্ডত প্ৰায় ৮৪ খন দোকান জুইত জাহ গৈছে। জানিব পৰা মতে, পুৱা প্ৰায় ৪ বজাত শ্বপিং কমপ্লেক্সত সংঘটিত হয় অগ্নিকাণ্ড। পুৱাৰ ভাগত সংঘটিত হোৱা অগ্নিকাণ্ডত কোনো লোকৰ মৃত্যু হোৱা নাই।
খবৰ লাভ কৰাৰ পিছতে অগ্নিনিৰ্বাপক বাহিনীৰ তিনিখন গাড়ী ঘটনাস্থলীত উপস্থিত হয়। কেইবা ঘণ্টাৰ প্ৰচেষ্টাৰ অন্তত নিয়ন্ত্ৰণলৈ অনা হয় অগ্নিকাণ্ড। খবৰ অনুসৰি, কোনো লোক আহত হোৱা নাই যদিও কেইবা লাখ টকাৰ সামগ্ৰীৰ ক্ষতিসাধন হৈছে।
অগ্নিনিৰ্বাপক বাহিনীৰ লগতে শ্বিলং পৌৰ বোৰ্ডৰ বিষয়াসকলে এই দুৰ্ঘটনাটো শ্বৰ্ট চাৰ্কিটৰ বাবে হোৱা বুলি অভিহিত কৰে। স্থানীয় বিধায়ক আম্পাৰিন লিংডোহ ঘটনাস্থলীলৈ গৈ পৰিস্থিতিৰ তদন্ত কৰে।
জানিব পৰা মতে, বিধায়কগৰাকীয়ে মুখ্যমন্ত্ৰী কনৰাড কে চাংমাক সাক্ষাৎ কৰে। ক্ষতিগ্ৰস্তসকলক স্থানান্তৰ আৰু ক্ষতিপূৰণৰ বিষয়ে আলোচনা কৰা হৈছে।
