ASSAM TIMES POST
গুৱাহাটীঃ শনিবাৰে গুৱাহাটীৰ দীঘলীপুখুৰীৰ পাৰত অৱস্থিত লক্ষীধৰ বৰা ক্ষেত্ৰত জনগোষ্ঠীয় সমন্বয় পৰিষদৰ এখন চোতাল সভা অনুষ্ঠিত হয়। সভাত কেবাটাও গুৰুত্বপূৰ্ণ সিদ্ধান্ত গ্ৰহণ কৰা হয়। সভাৰ সিদ্ধান্তৰ কথা সদৰী কৰি এক বিবৃতিত পৰিষদৰ মুখ্য আহ্বায়ক মমিনুল আৱালে কয় যে অসম চুক্তিৰ ৬নং দফা কাৰ্যকৰী কৰাৰ ক্ষেত্ৰত চন, তাৰিখ, খিলঞ্জীয়া বা অসমীয়াৰ সংজ্ঞা বিচাৰি অযথা সময় নষ্ট কৰি লাভ নাই।
প্ৰব্ৰজনৰ দ্বাৰা ক্ষতিগ্ৰস্ত জনগোষ্ঠীসমূহকহে সাংবিধানিক সুৰক্ষা কৱচ দিব লাগে। কোনো কাৰণতে পূৰ্ববংগ বা পশ্চিম পাকিস্তানৰপৰা প্ৰব্ৰজন কৰা মানুহৰ সতি-সন্ততিয়ে সাংবিধানিক সুৰক্ষা কৱচ লাভ কৰিব নোৱাৰিব। বিবৃতিটোত তেওঁ আৰু উল্লেখ কৰে যে প্ৰব্ৰজিত মুছলমানৰ দ্বাৰা ২৫টা বিধানসভা সমষ্টিত স্থানীয় জনগোষ্ঠীয়ে ৰাজনৈতিক অধিকাৰ হেৰুৱাৰ উপক্ৰম হৈছে। গতিকে এই ২৫ টা বিধানসভা সমষ্টিত স্থানীয় জনগোষ্ঠীৰ বাবে সংৰক্ষণ কৰিব লাগে। অসম বিধানসভাত অসমৰ সৰু-সৰু কেতবোৰ জনগোষ্ঠীয়ে প্ৰতিনিধিত্ব কৰাৰপৰা বঞ্চিত হৈ আহিছে।
সেয়েহে এই সৰু-সৰু জনগোষ্ঠীসমূহ যেনেঃ হাজং, দেউৰী, চাহ জনগোষ্ঠী জলহা আদি জনগোষ্ঠীৰ প্ৰতিনিধিত্বৰ বাবে উচ্চ সদনৰ ব্যৱস্থা কৰিব লাগে। এই দাবীকেইটাৰ সমৰ্থনতে শনিবাৰৰ সভাত গুৱাহাটীত এখন গণসমাৱেশ অনুষ্ঠিত কৰাৰ বাবে সিদ্ধান্ত গ্ৰহণ কৰা হয় বুলি বিবৃতিটোত প্ৰকাশ।
আৱালে আকৌ কয় যে কোনো কাৰণতে যাতে প্ৰব্ৰজিত মুছলমানে সাংবিধানিক সুৰক্ষা লাভ কৰিব নোৱাৰে তাৰ বাবে পৰিষদে প্ৰৱল জমনত গঠন কৰিব। পৰিষদৰ তৰফৰপৰা ২০ ছেপ্টেম্বৰত অসম চুক্তিৰ ৬নং দফা ৰূপায়ণৰ বাবে চৰকাৰে গঠন কৰা উচ্চস্তৰীয় সমিতিৰ ওচৰত এই প্ৰসংগতে স্মাৰক পত্ৰ প্ৰদান কৰা হৈছে বুলি বিবৃতিটোত আৱালে উল্লেখ কৰে।
