বিলাসীপাৰাত সংঘটিত হৈছে এক ভয়াৱহ পথ দুৰ্ঘটনা (Bilasipara Accident)। বিলাসীপাৰাৰ ভাসানী গাঁৱত সংঘটিত হৈছে এই পথ দুৰ্ঘটনা। এখন চাৰিচকীয়া বাহন (XUV) আৰু বাইকৰ মুখামুখি সংঘৰ্ষত নিহত হয় দুই বাইক আৰোহী। আনহাতে, দুৰ্ঘটনাটো সংঘটিত কৰিয়ে বাহনখনে ঘটনাস্থলীৰ পৰা পলায়নৰ চেষ্টা কৰে যদিও ৰাইজে হাজাৰীপাৰাত বাহনখন জব্দ কৰে। ইফালে ঘটনাৰ খবৰ পোৱাৰ লগে লগে ঘটনাস্থলীত লক্ষীগঞ্জ আৰক্ষী উপস্থিত হৈ তদন্ত আৰম্ভ কৰে।
বৃহস্পতিবাৰে নিশা সংঘটিত হয় এই শোকাৱহ পথ দুৰ্ঘটনাটো। প্ৰথমাৱস্থাত দুৰ্ঘটনাটোত দুই বাইক আৰোহী অৱসৰপ্ৰাপ্ত সেনা জোৱান সুধাংশু মোহন নাথ আৰু পুৰেণ থাপা গুৰুতৰভাৱে আঘাতপ্ৰাপ্ত হয়। স্থানীয় ৰাইজৰ সহযোগত তেওঁলোকক উদ্ধাৰ কৰি লক্ষীগঞ্জ আৰক্ষীয়ে ততাতৈয়াকৈ এজনক বিলাসীপাৰা আদৰ্শ চিকিৎসালয়লৈ আৰু আনজনক কোকৰাঝাৰ চিকিৎসা মহাবিদ্যালয়ত প্ৰেৰণ কৰে।
পৰৱৰ্তী সময়ত উন্নত চিকিৎসাৰ বাবে সুধাংশু নাথক কোকৰাঝাৰ চিকিৎসা মহাবিদ্যালয়লৈ প্ৰেৰণ কৰে যদিও দুয়োজনৰে চিকিৎসাধীন অৱস্থাত মৃত্যু হয়। এই শোকাৱহ পথ দুৰ্ঘটনাটোৱে সমগ্ৰ অঞ্চলটোতে শোকৰ ছাঁ পেলাইছে।
