প্ৰথম কম্পনটো চম্ভালাৰ পূৰ্বেই আন এটা ভূমিকম্প। এই দুটা কম্পনৰ পিছত ভেনিজুৱেলা (Venezuela earthquake) কাৰ্যতঃ অসহায় হৈ পৰিছে। বুধবাৰে সন্ধিয়া (ভেনিজুৱেলাৰ স্থানীয় সময় অনুসৰি) প্ৰথমে সৰু দেশখনক ৭.২ ৰিখটাৰ স্কেলৰ ভূমিকম্পই কঁপাই তুলিছিল।
৩৯ ছেকেণ্ডৰ ভিতৰতে আন এক কম্পণত কঁপি উঠে দেশখন। ৰিখটাৰ স্কেলত এই ভূমিকম্পৰ প্ৰাবল্য আছিল ৭.৫। ভেনিজুৱেলাৰ অন্তৱৰ্তীকালীন ৰাষ্ট্ৰপতি ডেলচি ৰড্ৰিগেজে কয় যে দেশখনত এতিয়ালৈকে কমেও ৩২জন লোকৰ মৃত্যু হৈছে। প্ৰায় ৭০০ লোক আহত হয়।
ভেনিজুৱেলাৰ ৰাজধানী কাৰাকাছ আৰু বন্দৰ চহৰ লা গুয়াইৰাত এই দুটা ভূমিকম্পৰ ফলত সৰ্বাধিক ক্ষতিসাধন হয়। দুয়োখন চহৰতে বহু ঘৰ ভাঙি পৰে। ভেনিজুৱেলাৰ মূল বিমানবন্দৰত ৰাণৱে ভাঙি ভিতৰলৈ যোৱাৰ বাবে সম্প্ৰতি বিমান সেৱা বন্ধ কৰি দিয়া হৈছে। ভূমিকম্পৰ ফলত বহু লোকৰ প্ৰাণ হেৰুওৱাৰ আশংকা কৰিছে আমেৰিকা যুক্তৰাষ্ট্ৰৰ ভূতাত্ত্বিক জৰীপ বিভাগে।
তেওঁলোকৰ মতে, দক্ষিণ আমেৰিকাৰ এই দেশখনত দুটা ভূমিকম্পৰ ফলত ১০ হাজাৰ লোকৰ মৃত্যু হ’ব পাৰে।
আমেৰিকাৰ ভূতাত্ত্বিক জৰীপৰ উদ্ধৃতি দি সংবাদ সংস্থা এ পিয়ে প্ৰকাশ কৰা অনুসৰি, প্ৰথমটো ভূমিকম্প কেৰিবিয়ান উপকূলৰ ম’ৰন অঞ্চলত কেন্দ্ৰ আছিল।
ৰাজধানী কাৰাকাছৰ পৰা ১৬৮ কিলোমিটাৰ দূৰত্বত অৱস্থিত এই স্থান। দ্বিতীয়টো কম্পনৰ কেন্দ্ৰ ম’ৰনৰ পৰা ১৬ কিলোমিটাৰ দক্ষিণ-পশ্চিমে। প্ৰথমটো কম্পন ভূগৰ্ভৰ ২২ কিলোমিটাৰত আৰু দ্বিতীয়টো ১০ কিলোমিটাৰ গভীৰতাত কেন্দ্ৰীভূত হৈছিল। দেশখনত সংঘটিত এই ভয়াৱহ দুৰ্যোগৰ পিছত ভেনিজুৱেলা প্ৰশাসনে জৰুৰীকালীন অৱস্থা ঘোষণা কৰে।
অন্তৱৰ্তীকালীন ৰাষ্ট্ৰপতি ডেলচিয়ে দেশবাসীক দিয়া ভাষণত সকলোকে শান্ত হৈ থাকিবলৈ আহ্বান জনায়। তেওঁ ভূমিকম্পত মৃত্যু হোৱা লোকসকলৰ পৰিয়াললৈ সমবেদনা জ্ঞাপন কৰে। দেশৰ সকলো স্বাস্থ্যকৰ্মীক আহতসকলক চিকিৎসালয়লৈ নিবলৈ অনুৰোধ জনোৱা হৈছে।
বৰ্তমান ভেনিজুৱেলাৰ বিদ্যালয়সমূহ বন্ধ ঘোষণা কৰা হৈছে। ইতিমধ্যে আমেৰিকাই ভেনিজুৱেলালৈ উদ্ধাৰকাৰী দল প্ৰেৰণ কৰিছে। আমেৰিকাৰ ৰাষ্ট্ৰপতি ড’নাল্ড ট্ৰাম্পে দক্ষিণ আমেৰিকাৰ দেশখনৰ কঠিন সময়ত তেওঁলোকৰ কাষত থিয় দিয়াৰ বাৰ্তা দিছে। প্ৰধানমন্ত্ৰী নৰেন্দ্ৰ মোদীয়েও ভেনিজুৱেলাৰ কাষত থিয় দিয়াৰ বাৰ্তা প্ৰদান কৰিছে।
বৃহস্পতিবাৰে পুৱা ছ’চিয়েল মিডিয়াত এটা পোষ্টত তেওঁ লিখিছে, “ভাৰতীয় জনসাধাৰণৰ হৈ ভেনিজুৱেলা চৰকাৰৰ প্ৰতি, বিশেষকৈ যিসকলে পৰিয়াল হেৰুৱাইছে, তেওঁলোকৰ প্ৰতি সমবেদনা জ্ঞাপন কৰিছোঁ। আহতসকলৰ আশু আৰোগ্য কামনা কৰিছোঁ। আমি এই কঠিন সময়ত ভেনিজুৱেলাৰ জনসাধাৰণৰ সৈতে থিয় দিছো। ভাৰতে যিকোনো প্ৰকাৰে সহায় কৰিবলৈ সাজু।”
কাৰাকাছকে ধৰি ভেনিজুৱেলাৰ বিভিন্ন চহৰত বহু লোক ধ্বংসাৱশেষৰ তলত আবদ্ধ হৈ পৰাৰ আশংকা কৰা হৈছে। এই পৰিস্থিতিত উদ্ধাৰ কাৰ্যত পলম হোৱাৰ অভিযোগ উত্থাপন হৈছে। স্থানীয় ৰাইজে শীঘ্ৰে ধ্বংসাৱশেষ আঁতৰাই শিশু আৰু বৃদ্ধসকলক নিৰাপদে উলিয়াই আনিবলৈ দাবী জনাইছে।
জনতাৰ ক্ষোভ অনুভৱ কৰি ভেনিজুৱেলাৰ গৃহমন্ত্ৰী ডিছডাডো কেবেলোৱে কয়, “আমি বুজি পাইছোঁ যে বহু লোকে ধৈৰ্য হেৰুৱাই পেলাইছে। অৱশ্যে আমি নিয়ম অনুসৰি উদ্ধাৰ অভিযান চলাইছোঁ। সাহায্য বিতৰণৰ ক্ষেত্ৰতো একে নিয়ম মানি চলা হ’ব। যিসকলক ইয়াৰ আটাইতকৈ প্ৰয়োজন তেওঁলোকক অগ্ৰাধিকাৰ দিয়া হ’ব।”
ভূতত্ত্ববিদসকলে কয় যে ভেনিজুৱেলাত যোৱা ১০০ বছৰত ইমান প্ৰবল ভূমিকম্প দেখা পোৱা নাই। ছ’চিয়েল মিডিয়াত প্ৰচাৰিত কেইবাটাও ভিডিঅ’ত দেখা গৈছে বিভিন্ন ভয়ানক ছবি। এটা ভিডিঅ’ত দেখা গৈছে যে ভেনিজুৱেলাৰ চাইমন বলিভাৰ বিমানবন্দৰৰ সমগ্ৰ টাৰ্মিনেলটো কঁপনি আৰম্ভ হোৱাৰ লগে লগে কঁপি উঠিছে।
আতংকিত হৈ দৌৰিছে যাত্ৰীসকল। কিছুমানে ভাৰসাম্য হেৰুৱাই পেলাইছে। কাৰাকাছৰ পৰা অহা এটা ভিডিঅ’ত দেখা গৈছে যে ভূমিকম্পৰ ফলত বহুমহলীয়া অট্টালিকা ভাঙি গৈছে। গোটেই অঞ্চলটো বগা ধূলিৰ চাদৰেৰে আবৃত।
