কেন্দ্ৰীয় চৰকাৰে দেশৰ ২৪৪ খন সংবেদনশীল জিলাত অত্যাধুনিক এয়াৰ-ৰেড সতৰ্কবাণী প্ৰণালী স্থাপন কৰিবলৈ গৈ আছে। আৰু সমগ্ৰ প্ৰকল্পটোৰ নেতৃত্ব দিবলৈ ভাৰতীয় বায়ু সেনাৰ অভিজ্ঞ বিশেষজ্ঞ নিয়োগৰ প্ৰক্ৰিয়া আৰম্ভ হৈছে।
এই আধুনিক ব্যৱস্থাই দ্ৰোণ, ক্ষেপণাস্ত্ৰ আৰু শত্রু বিমানকে ধৰি সকলো ধৰণৰ আকাশী ভাবুকিৰ মোকাবিলা কৰাত ফলপ্ৰসূ হ’ব। ২০২৫ চনত সমগ্ৰ দেশত আৰম্ভ কৰা অপাৰেচন সিন্ধুৰৰ পিছত এক আভ্যন্তৰীণ চৰকাৰী মূল্যায়নত দেখা গৈছে যে দেশৰ বেছিভাগ পুৰণি চাইৰেন আৰু এয়াৰ ষ্ট্ৰাইক সতৰ্কবাণী প্ৰণালী নিষ্ক্ৰিয় হৈ পৰিছে।
সাম্প্ৰতিক যুদ্ধক্ষেত্ৰত ড্ৰোনৰ বৰ্ধিত ব্যৱহাৰৰ সৈতে গৃহ মন্ত্ৰালয়ে নাগৰিকসকলৰ সুৰক্ষাৰ বাবে এক স্থায়ী আৰু আধুনিক বায়ু প্ৰতিৰক্ষা সতৰ্কবাণী প্ৰণালীৰ প্ৰয়োজনীয়তা অনুভৱ কৰে। প্ৰকল্পটো গৃহ মন্ত্ৰালয়ৰ অধীনত অগ্নি নিৰ্বাপক সেৱা, অসামৰিক প্ৰতিৰক্ষা আৰু গৃহৰক্ষী বাহিনীৰ সঞ্চালকসকলে পৰিচালনা কৰি আছে।
বায়ু সেনাৰ প্ৰাক্তন সৈনিকসকলক নিযুক্তি দিয়া হৈছে যাৰ বায়ু প্ৰতিৰক্ষা অভিযান, ৰাডাৰ প্ৰণালী আৰু এয়াৰ ষ্ট্ৰাইক সতৰ্কবাণী প্ৰণালীত ব্যাপক অভিজ্ঞতা আছে। দেশৰ ২৪৪খন সংবেদনশীল জিলা, বিশেষকৈ সীমান্তৱৰ্তী অঞ্চলসমূহক এই আধুনিক নেটৱৰ্কৰ আওতালৈ অনা হ’ব।
নতুন প্ৰযুক্তি স্থাপনৰ সমান্তৰালভাৱে অসামৰিক প্ৰতিৰক্ষা স্বেচ্ছাসেৱকসকলৰ প্ৰশিক্ষণৰ আন্তঃগাঁথনিও নৱীকৰণ কৰা হ’ব। প্ৰকল্পটোৰ দায়িত্বত থকা বিশেষজ্ঞৰ পদবী কমেও উইং কমাণ্ডাৰ (ভাৰতীয় সেনাৰ লেফটেনেণ্ট কৰ্ণেলৰ সমতুল্য) বা তাতকৈ অধিক হ’ব লাগিব।
সকলো ধৰণৰ বিমান, ড্ৰোন, ক্ষেপণাস্ত্ৰ আৰু ৰকেট আক্ৰমণৰ পৰা ৰাষ্ট্ৰীয় ৰাজধানী দিল্লীৰ আকাশসীমা সুৰক্ষিত কৰিবলৈ ভাৰতে এক থলুৱাভাৱে বিকশিত উন্নত বায়ু প্ৰতিৰক্ষা অস্ত্ৰ প্ৰণালী মোতায়েন কৰিবলৈ সাজু হৈছে।
