ষষ্ঠদশ অসম বিধানসভাৰ (Assam Legislative Assembly) বিৰোধী দলপতি (Leader of the opposition) হিচাপে ৱাজেদ আলী চৌধুৰীক (Wazed Ali Chowdhury) কংগ্ৰেছ হাইকমাণ্ডে অনুমোদন জনাইছে। আনহাতে, বৃহস্পতিবাৰে সন্ধিয়া অনুষ্ঠিত হ’বলগীয়া কংগ্ৰেছ বিধায়িনী দলৰ বৈঠকত ৱাজেদ আলী চৌধুৰীক বিৰোধী দলপতি হিচাপে অনুষ্ঠানিকভাৱে ঘোষণা কৰাৰ সম্ভাৱনা আছে৷
উল্লেখ্য যে এইবাৰ বিধানসভা নিৰ্বাচনত কংগ্ৰেছে মাত্ৰ ১৯ খন আসনহে লাভ কৰিবলৈ সক্ষম হয়। তেনে ক্ষেত্ৰত বিৰোধী দলপতিৰ মৰ্যাদা লাভৰ বাবে প্ৰয়োজনীয় বিধায়কৰ সংখ্যা অতি কমেও ২১ জনতকৈ কম আছে। কিয়নো পূৰ্বৰ নিয়ম অনুসৰি বিধানসভাত এক ষষ্ঠাংশ আসন লাভ কৰিলেহে বিৰোধী দলপতি পদ লাভ কৰিব পাৰে। কিন্তু ২০০১ চনত সংশোধিত আইন অনুসৰি ইয়াক এক দশমাংশলৈ হ্ৰাস কৰাৰ ফলত এতিয়া ১৩ জন বিধায়ক থাকিলেই কোনো দলে বিৰোধী দলপতি পদ লাভ কৰিব পাৰে। কিন্তু এইক্ষেত্ৰত বিধানসভাৰ অধ্যক্ষৰ সিদ্ধান্তৰ ওপৰত বিষয়টো নিৰ্ভৰ কৰে।
