আৰ জি কৰ গোচৰ (RG Kar Case)ত চিবিআই তদন্তৰ নিৰ্দেশ (CBI probe ordered) কলিকতা উচ্চ ন্যায়ালয় (Calcutta High Court)ৰ। মঙলবাৰে মুখ্য ন্যায়াধীশ টি এছ শিৱগনামে গোচৰৰ কেছ ডায়েৰী পৰীক্ষা কৰি এই নিৰ্দেশ দিয়ে। লগতে উচ্চ ন্যায়ালয়ে কয় যে ৰাজ্যৰ হাতত থকা সকলো তথ্য আৰু নথি-পত্ৰ চিবিআইক দিব লাগে। কেৱল সেয়াই নহয়, আৰক্ষীয়ে সংগ্ৰহ কৰা চিচিটিভি ফুটেজো চিবিআইক গতাই দিবলৈ কয়।
আনহাতে, আৰ জি কৰ গোচৰত আৰক্ষীৰ ভূমিকাক লৈ অসন্তুষ্টি প্ৰকাশ কৰে মুখ্য ন্যায়াধীশগৰাকীয়ে। মঙলবাৰে আৰ জি কৰ গোচৰত দাখিল কৰা ৫টা জনস্বাৰ্থ জড়িত গোচৰৰ একেসময়তে শুনানি গ্ৰহণ কৰা হয়। দিনৰ ১ বজাত ৰাজ্য চৰকাৰে কেছ ডায়েৰী আদালতত দাখিল কৰে। উক্ত প্ৰতিবেদন পঢ়ি আৰক্ষীৰ ভূমিকাক লৈ প্ৰশ্ন উত্থাপন কৰে মুখ্য ন্যায়াধীশে।
উল্লেখ্য যে যোৱা শুকুৰবাৰে আৰ জি কৰ চিকিৎসা মহাবিদ্যালয়ৰ জৰুৰীকালীন বিভাগৰ চতুৰ্থ মহলাত এগৰাকী মহিলা চিকিৎসকৰ মৃতদেহ ৰক্তাক্ত অৱস্থাত উদ্ধাৰ কৰা হয়। এই ঘটনাই ৰাজ্যৰ লগতে সমগ্ৰ দেশতে তীব্ৰ চাঞ্চল্যৰ সৃষ্টি কৰে। আৰ জি কৰৰ কনিষ্ঠ চিকিৎসকসকলে হত্যা আৰু ধৰ্ষণৰ অভিযোগ উত্থাপন কৰি আন্দোলনত বহে। পিছত আন চিকিৎসকেও এই আন্দোলনত যোগদান কৰে। কিন্তু সেই আন্দোলন বৰ্তমান কেৱল আৰ জি কৰতে সীমাবদ্ধ হৈ থকা নাই। এই ঘটনাৰ দোষীক কঠোৰ শাস্তি প্ৰদানৰ দাবীত ৰাজ্যৰ বিভিন্ন চিকিৎসালয়ত এই আন্দোলন বিয়পি পৰে। আনকি দেশৰ বিভিন্ন চিকিৎসালয়ৰ চিকিৎসকেও প্ৰতিবাদী কাৰ্যসূচী অনুষ্ঠিত কৰে।
ইতিমধ্যে আৰ জি কৰ চিকিৎসা মহাবিদ্যালয়ৰ চিকিৎসকগৰাকীৰ হত্যাকাণ্ড সন্দৰ্ভত কেইবাটাও তথ্য পোহৰলৈ আহিছে। উক্ত তথ্যবোৰৰ পৰা স্পষ্ট যে যুৱতীগৰাকীক নিৰ্মমভাৱে অত্যাচাৰ কৰি হত্যা কৰা হৈছিল। এই ঘটনাত ইতিমধ্যে আৰক্ষীয়ে গ্ৰেপ্তাৰ কৰিছে এজন ব্যক্তিক। এই ঘটনাত আন কোনো লোক জড়িত থকাৰ কোনো প্ৰমাণ পোৱা নাই। আনহাতে, শনিবাৰে অভিযুক্তক শিয়ালদহ আদালতত হাজিৰ কৰা হয়। আদলতে অভিযুক্তক ১৪ দিনৰ বাবে আৰক্ষীৰ জিম্মাত ৰখাৰ নিৰ্দেশ দিয়ে।
