চিবিআয়ে তদন্ত চলাই থকা মণিপুৰৰ হিংসা সম্পৰ্কীয় গোচৰৰ শুনানি (Hearing of cases related to violence in Manipur) গ্ৰহণ কৰিব গুৱাহাটীত । শুকুৰবাৰে এই নিৰ্দেশ দিয়ে উচ্চতম ন্যায়ালয়ে (Supreme Court order)। মুখ্য ন্যায়াধীশ ডি ৱাই চন্দ্ৰচুড়ৰ নেতৃত্বত উচ্চতম ন্যায়ালয়ৰ বিচাৰপীঠে সেই গোচৰসমূহৰ বিচাৰৰ বাবে গুৱাহাটী উচ্চ ন্যায়ালয়ৰ মুখ্য ন্যায়াধীশক নিম্ন আদালত (Gauhati High Court Chief Justice to Lower Court) মনোনীত কৰাৰ দায়িত্ব প্ৰদান কৰে। উচচতম ন্যায়ালয়ে কয় যে গ্ৰেপ্তাৰ হোৱা লোকসকলৰ জিম্মা, হিংসাৰ অভিযোগত অভিযুক্ত ব্যক্তি আৰু সাক্ষীৰ শুনানিও গুৱাহাটীত অনুষ্ঠিত হʼব।
অৱশ্যে শাৰীৰিক উপস্থিতিৰ লগতে ভাৰ্চুৱেল শুনানিও চলি থাকিব পাৰে বুলি উচ্চতম ন্যায়ালয়ে কয়। ইয়াৰ বাবে প্ৰয়োজনীয় ইণ্টাৰনেট সেৱাৰ ব্যৱস্থা কৰিবলৈ মণিপুৰ চৰকাৰক নিৰ্দেশ দিয়া হৈছে। উল্লেখযোগ্য যে যোৱা ২০ জুলাইত মণিপুৰৰ কাংপকপিত দুগৰাকী মহিলাক বিবস্ত্ৰ কৰি ৰাজপথত ঘূৰোওৱাৰ ভিডিঅ’ আৰু দলীয় ধৰ্ষণৰ অভিযোগৰ ওপৰত তীব্ৰ প্ৰতিক্ৰিয়া প্ৰকাশ কৰিছিল দেশৰ শীৰ্ষ ন্যায়ালয়ে।
ইয়াৰ পিছতে যোৱা ৮ আগষ্টত মণিপুৰৰ হিংসাৰ তদন্ত আৰু হিংসাৰ বলি হোৱা লোকসকলৰ সাহায্য আৰু পুনৰ সংস্থাপনৰ ওপৰত নজৰ ৰাখিবলৈ মুখ্য ন্যায়াধীশ চন্দ্ৰচুড়ৰ বিচাৰপীঠে উচ্চ ন্যায়ালয়ৰ তিনিগৰাকী অৱসৰপ্ৰাপ্ত মহিলা ন্যায়াধীশৰ এখন সমিতি গঠন কৰা হয়।
চলিত মাহত চিবিআয়ে মণিপুৰত সংঘটিত হিংসাত্মক ঘটনাৰ তদন্তৰ বাবে ২৯গৰাকী মহিলা বিষয়াসহ ৫৩গৰাকী বিষয়াৰে ‘এছআইটি’ গঠন কৰে। চিবিআইৰ যুটীয়া সঞ্চালক ঘনশ্যাম উপাধ্যায়ে সমগ্ৰ তদন্ত প্ৰক্ৰিয়া তদাৰক কৰিব। সংস্থাটোৰ এক সূত্ৰই জনোৱা মতে, চিবিআইৰ ইতিহাসত কেতিয়াও কোনো ঘটনাৰ তদন্তৰ বাবে ইমান বৃহৎ সংখ্যক বিষয়া নিযুক্তি দিয়া হোৱা নাই।
