মোডী উপাধিৰ অৱমাননাৰ গোচৰত চুৰাট সত্ৰ আদালতৰ ৰায়ক প্ৰত্যাহ্বান জনাই ৰাহুল গান্ধীৰ (Rahul Gandhi) আবেদনৰ শুনানি আৰম্ভ হৈছে গুজৰাট উচ্চ ন্যায়ালয়ত (Gujrat High Court)। শনিবাৰে পুৱা ন্যায়াধীশ হেমন্ত প্ৰচ্চাৰ বিচাৰপীঠত শুনানি আৰম্ভ হৈছে।
যোৱা মঙলবাৰে ৰাহুলৰ অধিবক্তাই ন্যায়াধীশ গীতা গোপীৰ বিচাৰপীঠৰ সন্মুখত শুনানিৰ বাবে তালিকাভুক্ত কৰা হৈছিল এই আবেদন। কিন্তু বুধবাৰে গুজৰাট উচ্চ ন্যায়ালয়ৰ ন্যায়াধীশ গোপীয়ে গোচৰৰ শুনানিৰ পৰা নিজকে আঁতৰাই নিয়ে। ৰাহুলৰ অধিবক্তা পি এছ চম্পানেৰীয়ে আবেদনৰ ক্ষিপ্ৰ শুনানিৰ বাবে কাতৰ অনুৰোধ জনোৱাৰ সময়তে ন্যায়াধীশ গোপীয়ে কয়, “মোৰ দ্বাৰা সেয়া নহয়।”
ইয়াৰ পিছত এই গোচৰটো ন্যায়াধীশ হেমন্তৰ বিচাৰপীঠলৈ যায়। যোৱা ২৩ মাৰ্চত গুজৰাটৰ চুৰাট দণ্ডাধীশ আদালতৰ ন্যায়াধীশ এইচ এইচ বাৰ্মাই ২০১৯ চনৰ লোকসভা নিৰ্বাচনী প্ৰচাৰৰ সময়ত কৰ্ণাটকৰ কোলাৰত ‘মোডী’ (Modi) উপাধিক লৈ আপত্তিজনক মন্তব্য কৰাৰ অপৰাধত ৰাহুল গান্ধীক ২ বছৰৰ কাৰাদণ্ড বিহে। কিন্তু ন্যায়াধীশগৰাকীয়ে ‘ফৌজদাৰী মানহানি’ গোচৰত ৰাহুলৰ জামিন আবেদনৰ অনুমতি দি উচ্চ ন্যায়ালয়ত ৰাহুলৰ বিৰুদ্ধে আপীল কৰিবলৈ ৩০ দিনৰ সময় দিয়ে।
উল্লেখযোগ্য যে ২৪ মাৰ্চত লোকসভাৰ অধ্যক্ষ ওম বিৰলাই ভাৰতৰ সংবিধানৰ ১০২(১) অনুচ্ছেদ আৰু জনপ্ৰতিনিধিত্ব আইন (১৯৫১)ৰ ৮(৩) অনুচ্ছেদ অনুসৰি, চুৰাট দণ্ডাধীশ আদালতৰ ৰায়ৰ ভিত্তিত ৰাহুলক সাংসদ হিচাপে বৰ্খাস্ত কৰে।ইয়াৰ পিছতে ৰাহুলে ৩ এপ্ৰিলত চুৰাটৰ সত্ৰ আদালতত দোষী সাব্যস্ত হোৱা আৰু শাস্তি স্থগিত ৰখাৰ বাবে দাখিল কৰে।
কিন্তু বৃহস্পতিবাৰে (২০ এপ্ৰিল) অতিৰিক্ত সত্ৰৰ ন্যায়াধীশ আৰ পি মোগেৰাই এই আবেদন খাৰিজ কৰি শাস্তিৰ ৰায় বাহাল ৰাখে। ফলত সাংসদ পদ পুনৰ লাভ কৰাৰ সম্ভাৱনা হেৰুওৱাৰ লগতে ৰাহুলৰ জে’লযাত্ৰাৰ সম্ভাৱনাও আৰম্ভ হৈছে। এনে পৰিস্থিতিত কংগ্ৰেছৰ উচ্চ ন্যায়ালয়ৰ সিদ্ধান্তৰ ওপৰত নজৰ ৰাখিছে।
