দীৰ্ঘ সময় ধৰি বাইক তথা গাড়ী চুৰি কৰাৰ লগতে ধন সংগ্ৰহ আৰু ডকাইতিৰে সন্ত্ৰাস সৃষ্টি কৰা সন্তোষ জয়ছোৱালক(Santosh Jaisowal) আৰক্ষীয়ে গুলী (Encounter)কৰে আৰু গুলিবিদ্ধ জয়ছোৱালৰ অসম মেডিকেল কলেজলৈ অনাৰ পথত মৃত্যু হয়। অসমৰ বিভিন্ন স্থানত বাইক চুৰি কৰি নাগালেণ্ডত বিক্ৰী কৰা এই দুৰ্ধৰ্ষ ডকাইত জয়ছোৱালে পলোৱাৰ সময়তে বৰবাম আৰক্ষীয়ে ভৰিত আৰু পেটত দুটাকৈ গুলী কৰে।
জয়ছোৱালক পূৰ্বেও আৰক্ষীয়ে কেইবাবাৰো গ্ৰেপ্তাৰ কৰিছিল। শেহতীয়াকৈ তিনিমাহৰ আগতে ডকাইতটোক জামিনত ঘৰলৈ লৈ অহা বুলি সংবাদ মাধ্যমৰ ওচৰত মন্তব্য কৰে পত্নীয়ে। লগতে ডকাইত গৰাকীয়ে গাড়ী চলাই আৰু পত্নীয়ে বাগানত কাম কৰি সংসাৰ চলাইছিল বুলি কোৱাৰ লগতে ডকাইত জয়ছোৱালৰ পিছত দুবছৰীয়া কন্যাৰ লগত তেওঁ কেনেদৰে জীয়াই থাকিব বুলি পত্নীয়ে আৰক্ষীক উদ্দেশ্যি প্ৰশ্ন কৰে।
তিনি মাহৰ পূৰ্বে জামিনত ওলাই অহা সন্তোষ জয়ছোৱালে সাপেখাতীৰ চেঁচা সত্ৰৰ শহুৰেকৰ বাসগৃহত থকা পত্নী-কন্যাৰ ওচৰলৈ গৈছিল।সন্তোষ ডিব্ৰুগড়ৰ টিংখাঙ আৰক্ষী থানাৰ ৰাজগড় ডঙৰপাৰাৰ নিবাসী বুলি জানিব পৰা গৈছে।
ডিব্ৰুগড়ৰ বৰবাম আৰক্ষী এটা দলে সাপেখাতীৰ চেঁচাৰ সন্তোষ জয়ছোৱালৰ শহুৰেকৰ বাসগৃহত উপস্থিত হৈছিল যদিও আৰক্ষীক দেখি পলায়ন কৰিছিল সন্তোষ জয়ছোৱাল। আৰক্ষীয়ে ৰ’বলৈ নিৰ্দেশ দিয়াৰ পাছতো সন্তোষ নোৰোৱাত আৰক্ষীয়ে পত্নীৰ কাকুতী- মিনতিকো আওকাণ কৰি গুলীচালনা কৰে ।অৱশেষত ডিব্ৰুগড়ৰ অসম মেডিকেললৈ অনাৰ পথত মৃত্যু হয়।
