অৰুণাচল প্ৰদেশত ১৩ হাজাৰ ফুট উচ্চতাত নিৰ্মাণৰ কাম চলি আছে ছেলা পাছ টানেল। এই সুৰংগৰ জৰিয়তে ভাৰতীয় সেনাই যিকোনো ঋতুতে চীনৰ সৈতে টাৱাঙত থকা প্ৰকৃত নিয়ন্ত্ৰণ ৰেখাত (এল এ চি) উপনীত হʼব পাৰিব।
সীমান্ত পথ সংস্থা চমুকৈ বি আৰ অ’ৱে ছেলা পাছ সুৰংগ নিৰ্মাণৰ কাম আৰম্ভ কৰিছে। এই সুৰংগ নিৰ্মাণৰ সৈতে জড়িত নন্দ কিশোৰে এক সংবাদ মাধ্যমৰ আগত কয় যে ২০২৩ চনৰ জুলাই মাহৰ ভিতৰত সুৰংগটোৰ নিৰ্মাণ সম্পূৰ্ণ হোৱাৰ সম্ভাৱনা আছে।
ভাৰতীয় সেনা আৰু স্থানীয় বাসিন্দাসকলে শীতকালত টাৱাংলৈ যাবলৈ বালিপাৰা-চাৰিদুৱাৰ পথ ব্যৱহাৰ কৰে। প্ৰচণ্ড বৰফ পৰাৰ বাবে ছেলা পাছৰ মাজেৰে যাত্ৰা কঠিন হৈ পৰে। যান-বাহনৰ চলাচলো সীমিত। ছেলা পাছৰ সুৰংগটো পথৰ এফালৰ পৰা পাৰ হৈ এই বৈশাখীক নুৰানোঙৰ সৈতে সংযোগ কৰিব। ছেলা সুৰংগটোৱে ছেলা-চাৰিবেলা ৰিজৰ মাজেৰে বক্ৰ হৈ টাৱাং জিলাক পশ্চিম কামেং জিলাৰ পৰা পৃথক কৰে।
সেনাৰ সূত্ৰ অনুসৰি, যিকোনো ঋতুতে সুৰংগটোৰ মাজেৰে যান-বাহনৰ চলাচল হʼব। লগতে সুৰংগ নিৰ্মাণ সম্পূৰ্ণ হোৱাৰ পিছত টাৱাঙলৈ দূৰত্ব প্ৰায় ৮-৯ কিলোমিটাৰ হ্ৰাস পাব বুলিও খবৰ পোৱা গৈছে। শেহতীয়াকৈ টাৱাঙৰ এল এ চিত ভাৰত-চীন সংঘাতৰ পৰিপ্ৰেক্ষিতত এই সুৰংগ নিৰ্মাণক তাৎপৰ্যপূৰ্ণ বুলি বিবেচিত হৈছে।
উল্লেখ্য, যোৱা ৯ ডিচেম্বৰত গভীৰ নিশা অৰুণাচল প্ৰদেশৰ টাৱাঙত প্ৰকৃত নিয়ন্ত্ৰণ ৰেখাৰ কাষত ভাৰত আৰু চীনৰ সৈন্যৰ মাজত সংঘৰ্ষৰ সৃষ্টি হয়। অভিযোগ অনুসৰি, শুকুৰবাৰে নিশা প্ৰায় ৩০০ চীনা সৈন্যই প্ৰকৃত নিয়ন্ত্ৰণ ৰেখা পাৰ হৈ ভাৰতত অনুপ্ৰৱেশ কৰিবলৈ চেষ্টা কৰিছিল। পিটিআইৰ বাতৰি অনুসৰি, চীনা সৈন্যই ১৭ হাজাৰ ফুট উচ্চতাৰ এটা শৃংগৰ ওপৰলৈ উঠিবলৈ চেষ্টা কৰিছিল।
পিএলএৰ জোৱানসকলে ভাৰতীয় সেনাৰ এটা চকী উভালি পেলোৱাৰ চেষ্টাও চলাইছিল। কিন্তু ভাৰতীয় সেনাই তেওঁলোকক ৰখাই দিয়াৰ লগে লগে দুয়োপক্ষৰ মাজত সংঘৰ্ষৰ সৃষ্টি হয়। সেনাৰ সূত্ৰৰ উদ্ধৃতি দি সংবাদ মাধ্যমত প্ৰকাশ পোৱা বাতৰি অনুসৰি, লাঠি-শিলৰ সৈতে সংঘটিত হোৱা এই কাজিয়া আৰু সংঘৰ্ষত ভাৰতীয় সেনাৰ ৬ জন জোৱান আহত হয়।
