মহাৰাষ্ট্ৰৰ ৪০ গৰাকী বিসম্বাদী বিধায়ক উদ্ধৱ ঠাকৰে নেতৃত্বাধীন চৰকাৰক বিপদত পেলাই বুধবাৰে গুৱাহাটীত আহি উপস্থিত হয়। তেওঁলোক গুৱাহাটীত উপস্থিত হোৱাক লৈ প্ৰতিক্ৰিয়া প্ৰকাশ কৰি মুখ্যমন্ত্ৰী ড° হিমন্ত বিশ্ব শৰ্মাই কয় যে, “বানপানীৰ সময়ত অসমলৈ লক্ষ্মী আহিছে, ভাল কথা। আমি হোটেলৰ পৰা কৰ পাম, এই সময়ত আমাক টকা লাগে।”
উল্লেখ্য যে, উক্ত ৪০ গৰাকী বিধায়ক বৰ্তমান গুৱাহাটীৰ ৰেডিশ্যন ব্লুত বাহৰ পাতি আছে। তেনেস্থলত, অসমৰ মুখ্যমন্ত্ৰীয়ে কয় যে, “বানপানীৰ সময়ত পৰ্যটক অসমলৈ নাহে কিন্তু চলিত বৰ্ষ হোটেলৰ পৰা আমি কৰ পাম। সকলো ৰাজ্যৰ লগতে বিদেশৰো যদিহে ৰাজনৈতিক কেন্দ্ৰ গুৱাহাটী হয় তেতিয়া অধিক ভাল পাম। ৰাজ্য চৰকাৰক এই সময়ত টকাৰ প্ৰয়োজন।”
লক্ষ্মী আহিলে আমি কোনোকালেই খেদি নিদিওঁ বুলি প্ৰকাশ কৰি হিমন্তই ৪০ গৰাকী বিধায়কৰ সৈতে তেওঁৰ কোনো লেনা-দেনা নাই বুলি মন্তব্য কৰে। লগতে, পাৰিলে তেওঁ বিধায়ক সকলৰ সৈতে ৫-১০ মিনিট কথা পাতিম বুলি প্ৰকাশ কৰে।
