কোভিডৰ (Covid) ভয়াৱহ দিনবোৰৰ কথা ভাবিলে আজিও গা শিয়ৰি উঠে। সকলোতে অক্সিজেনৰ অভাৱৰ বাবে হাহাকাৰ লগাৰ সময়তে বেংগালুৰু (Bengaluru)ৰ এজন যুৱকে নিজা উদ্যোগত ৰাইজৰ কাষত থিয় দিছিল। কিন্তু আজি তেওঁ সেই নিস্বাৰ্থ সেৱাৰ বাবে চৰম হাৰাশাস্তিৰ সন্মুখীন হৈছে। কৰোনা মহামাৰীৰ সময়ত বিনয় কুমাৰ (Vinay Kumar) নামৰ সমাজকৰ্মীজনে বিদেশৰ পৰা মৃত্যুমুখত পৰা ৰোগীসকলৰ বাবে অক্সিজেন কনচেণ্ট্ৰেটৰ আনিছিল। আৰু এতিয়া সুদীৰ্ঘ পাঁচ বছৰৰ পাছত শুল্ক বিভাগে তেওঁলৈ প্ৰায় ৩৫.৫ লাখ টকাৰ বিল পঠিয়াইছে। বিনয় কুমাৰ পেছাত এজন মহাকাশ অভিযন্তা।
২০২১ চনৰ মে’ মাহত কোভিডৰ দ্বিতীয় ঢৌৰ সময়ত তেওঁ নিজৰ উদ্যোগ আৰু অনুদানৰ জৰিয়তে জাৰ্মানীৰ পৰা ৭০০ টা অক্সিজেন কনচেণ্ট্ৰেটৰ দেশলৈ আনিছিল। ইয়াৰ পিছতে সেইবোৰ দেশৰ বিভিন্ন প্ৰান্তত বিনামূলীয়াকৈ বিতৰণ কৰে। কিন্তু শেহতীয়াকৈ তেওঁ মুম্বাইৰ শুল্ক বিভাগৰ পৰা জাননী লাভ কৰে। জাননীত কোৱা হৈছে যে তেওঁ কনচেণ্ট্ৰেটৰ অনাৰ সময়ত ব্যৱহাৰ কৰা ‘ইম্প’ৰ্ট এক্সপ’ৰ্ট ক’ড’ মূলতঃ ব্যক্তিগত সামগ্ৰী আমদানি কৰাত ব্যৱহাৰ কৰা হয়। ফলত নিয়ম অনুসৰি তেওঁ ৩৫ শতাংশ শুল্ক শুল্ক, ১০ শতাংশ সমাজ কল্যাণ চাৰ্চাৰ্জ আৰু ২৮ শতাংশ আইজিএছটিকে ধৰি মুঠ ৩৫ লাখ টকাৰো অধিক কৰ দিব লাগিব।
কিন্তু কৰোনাৰ চৰম সংকটৰ সময়ত কেন্দ্রীয় চৰকাৰে চিকিৎসা সা-সঁজুলি আমদানিৰ সকলো শুল্ক আৰু কৰ ৰেহাই দিছিল৷ বিনয়ে কয় যে তেওঁ আৰম্ভণিৰে পৰাই স্পষ্ট কৰি দিছিল যে কনচেণ্ট্ৰেটৰসমূহ ব্যক্তিগত ব্যৱহাৰৰ বাবে নহয়, বিনামূলীয়া বিতৰণৰ বাবেহে। লগতে যিসকলক দিয়া হৈছিল তেওঁলোকৰ স্বাক্ষৰ আৰু বিষয়াসকলৰ প্ৰশংসা-পত্ৰও তেওঁৰ হাতত আছে।
ইয়াৰ পিছতো তেওঁক এতিয়া নিৰ্দিষ্ট ন’ডেল অফিচাৰৰ পৰা চাৰ্টিফিকেট নোলোৱাৰ অজুহাতত এই বৃহৎ ধনৰাশি জৰিমনা হিচাপে দিবলৈ কোৱা হৈছে। ফলত চৰম বিপদৰ সময়ত হাজাৰ হাজাৰ লোকৰ জীৱন ৰক্ষা কৰা মানুহজন এতিয়া চৰকাৰৰ এই হাৰাশাস্তিৰ বলি হৈছে। ছ’চিয়েল মিডিয়াত এই খবৰ বিয়পি পৰাৰ লগে লগে নেটিজেনে চৰকাৰৰ এই অদ্ভুত আচৰণক সমালোচনা কৰিবলৈ আৰম্ভ কৰিছে।
