বিহাৰৰ পাটনাৰ জ্ঞানবিন্দু কোচিং চেণ্টাৰৰ স্বত্বাধিকাৰী ৰোশন আনন্দৰ ভাতৃ প্ৰিন্স যাদৱৰ মৃত্যুক কেন্দ্ৰ কৰি ৰহস্য বাঢ়িছে। দেওবাৰে নেপালৰ বিৰাটনগৰৰ এখন হোটেলৰ পৰা উদ্ধাৰ কৰা হয় প্ৰিন্সৰ মৃতদেহ।
খান ছাৰৰ প্ৰশিক্ষণ কেন্দ্ৰত আক্ৰমণৰ চলোৱাৰ অভিযোগ প্ৰিন্সৰ বিৰুদ্ধে। শেহতীয়াকৈ দুয়োটা প্ৰশিক্ষণ কেন্দ্ৰৰ মাজত অশান্তিৰ সৃষ্টি হৈছিল। কেৱল সেয়াই নহয়, গুলীচালনাৰ অভিযোগো উত্থাপন হৈছিল। এই উত্তেজনাৰ মাজতে অভিযুক্ত প্ৰিন্সৰ মৃতদেহ উদ্ধাৰে এক চাঞ্চল্যৰ সৃষ্টি কৰিছে।
সূত্ৰ অনুসৰি, প্ৰিন্সৰ সৈতে ৬ বন্ধু নেপাললৈ গৈছিল। তাতে এখন হোটেলত আছিল। দেওবাৰে হোটেলৰ কোঠাৰ পৰা উদ্ধাৰ হয় প্ৰিন্সৰ মৃতদেহ। সূত্ৰ অনুসৰি, তেওঁৰ চকুৰ ওপৰত আৰু শৰীৰৰ কেইবাটাও অংশত আঘাতৰ চিন আছে। ফলত সন্দেহ বৃদ্ধি পাইছে।
কিন্তু নেপাল আৰক্ষীয়ে এই সন্দৰ্ভত একো ক’ব বিচৰা নাই। মৰণোত্তৰ পৰীক্ষাৰ প্ৰতিবেদনৰ বাবে অপেক্ষা কৰি থকা হৈছে। তাৰ পিছতহে প্ৰিন্সৰ মৃত্যু কেনেকৈ হ’ল সেয়া স্পষ্ট হ’ব।
ছ’চিয়েল মিডিয়াৰ সূত্ৰৰ জৰিয়তে প্ৰিন্সৰ মৃত্যুৰ বিষয়ে জানিবলৈ পোৱা বুলি পৰিয়ালটোৱে দাবী কৰিছে। পৰিয়ালৰ সূত্ৰ অনুসৰি, নেপাল আৰক্ষীয়ে ৫ জন লোকক গ্ৰেপ্তাৰ কৰিছে। জানিব পৰা মতে, জিলা পৰিষদৰ নিৰ্বাচনত প্ৰিন্স প্ৰাৰ্থী হোৱাৰ কথা আছিল। তেওঁ ছাহৰছাৰ সৌৰাবজাৰৰ পৰা প্ৰাৰ্থী হোৱাৰ প্ৰস্তুতিও চলাইছিল।
কিন্তু ইয়াৰ মাজতে প্ৰিন্সৰ ৰহস্যজনক মৃত্যুক লৈ বিভিন্ন জল্পনা-কল্পনা তীব্ৰতৰ হ’বলৈ আৰম্ভ কৰিছে। তুলনামূলকভাৱে ২০২১ চনতো খান ছাৰৰ প্ৰশিক্ষণ কেন্দ্ৰত আক্ৰমণ হৈছিল। ৰৌশন ছাৰৰ ভাতৃৰ বিৰুদ্ধে সেই আক্ৰমণৰ অভিযোগ উঠিছিল। অভিযোগ অনুসৰি, সেই সময়ত প্ৰিন্সে খান ছাৰৰ কোচিং চেণ্টাৰত প্ৰৱেশ কৰি তাণ্ডৱ চলায়।
দুই ছাৰৰ কোচিং চেণ্টাৰৰ মাজত চলি থকা ‘প্ৰতিদ্বন্দ্বিতা’ কেইবাবছৰ ধৰি চলি আহিছে। ২ জুনত খান ছাৰৰ কোচিং চেণ্টাৰ আৰু ৰৌশন ছাৰৰ জ্ঞানবিন্দু কোচিঙৰ মাজত ব্যৱসায়িক প্ৰতিদ্বন্দ্বিতাৰ বাবে প্ৰথমে কাজিয়া সংঘটিত হয়, তাৰ পিছত গুলীচালনাৰ কাণ্ড সংঘটিত হয়।
বিহাৰৰ ৰাজধানী পাটনাত খান ছাৰৰ কোচিং ইনষ্টিটিউট আৰু জ্ঞানবিন্দু কোচিঙৰ সদস্যৰ মাজত সংঘটিত হোৱা কাজিয়াত আৰক্ষীয়ে দুজন নিৰাপত্তাৰক্ষীক গ্ৰেপ্তাৰ কৰিছে। খান ছাৰৰ বিৰুদ্ধে এফআইআৰ দাখিল কৰা হৈছে। জ্ঞানবিন্দু কোচিং চেণ্টাৰৰ শিক্ষক ৰৌশনকো গ্ৰেপ্তাৰ কৰা হয়।
