মঙলবাৰে পুৱা প্ৰায় ৮ বাজি ৩০ মিনিটত বোকাজান মহকুমাৰ অন্তৰ্গত ডিলাইত আৰক্ষীৰ নিয়মীয়া নাকা তালাচীত প্ৰায় ৮ কোটি টকা বজাৰ মূল্যৰ গাঞ্জা সহ দুটা সৰবৰাহকাৰীক আটক কৰিবলৈ সক্ষম হয় ডিলাই আৰক্ষী ৷
ডিলাই থানাৰ অ’চি আকাশ গগৈৰ নেতৃত্বত আৰু থানা ষ্টাফৰ সহযোগত ডিলাই তিনি আলিত নিয়মীয়া নাকা তালাচী কালত RJ18GB 0126 পঞ্জীয়ন নম্বৰৰ কণ্টেইনাৰ ট্ৰাকৰ গোপন চেম্বাৰত লুকুৱাই অনা ১৪৮ টা পেকেটত এক কুইণ্টল চাৰিশ সাতানব্বৈ দশমিক দুই পাঁছ পাঁছ কেজি গাঞ্জা উদ্বাৰ কৰিবলৈ সক্ষম হয় ৷ গাঞ্জাখিনিৰ বজাৰ মূল্য প্ৰায় ৮ কোটি টকা হব বুলি অনুমান কৰা হৈছে ৷
গাঞ্জাখিনি সৰবৰাহৰ লগত জড়িত ৰাজস্থান ঝুনঝুন নুৱানৰ নিৱাসী জাফৰ আলিৰ পুত্ৰ দিলদাৰ আৰু হাৰিয়ান চিৰচা জিলাৰ চিৰচাৰ নিৱাসী কৃষণ কুমাৰৰ পুত্ৰ অজয় কুমাৰক আটক কৰি আৰক্ষীয়ে জেৰা অব্যাহত ৰাখিছে বুলি জানিব পৰা গৈছে ৷ উদ্ধাৰ হোৱা গাঞ্জাখিনি নিৰপেক্ষ সাক্ষীগণৰ সাক্ষাতে জব্দ কৰি সংশ্লিষ্ট আইনৰ ধাৰাত এক গোছৰ ৰুজো কৰা হৈছে বুলি আৰক্ষীৰ সূত্ৰত প্ৰকাশ ৷
