এইবাৰ পুৰীৰ জগন্নাথ মন্দিৰত (Puri Jagannath Mandir) সন্ত্ৰাসবাদী আক্ৰমণৰ ভাবুকি। বুধবাৰে পুৱা পুৰীৰ শতিকা পুৰণি মন্দিৰটোৰ দেৱালত দুটা ভাষাত লিখা ভাবুকিমূলক বাৰ্তা উদ্ধাৰ হয়। বেঁকা হাতৰ আখৰেৰে লিখা বাৰ্তাটোৱে অঞ্চলটোৰ সকলোকে আতংকিত কৰি তুলিছে। যাৰ বাবে সমগ্ৰ মন্দিৰ চৌহদত জৰুৰীভাৱে নিৰাপত্তা বৃদ্ধি কৰা হৈছে।
স্থানীয় সংবাদ মাধ্যমৰ সূত্ৰ অনুসৰি, বুধবাৰে পুৱা পুৰীৰ জগন্নাথ মন্দিৰৰ দক্ষিণে পৰিক্ৰমা মাৰ্গৰ সমীপৰ এটা মন্দিৰৰ বেৰত স্থানীয় ৰাইজে এটা ভাবুকি বাৰ্তা উদ্ধাৰ কৰে। বাৰ্তাটো উৰিয়া আৰু ইংৰাজী দুয়োটা ভাষাতে লিখা হৈছিল। তাত লিখা আছিল, “সন্ত্ৰাসবাদীয়ে জগন্নাথ মন্দিৰত আক্ৰমণ কৰিব। মন্দিৰটো ভাঙি পেলোৱা হ’ব।”
দাবী কৰা হৈছে যে বাৰ্তাটোত প্ৰধানমন্ত্ৰী নৰেন্দ্ৰ মোদীৰ নামো লিখা হৈছে। ইয়াৰ উপৰি কেইবাটাও ফোন নম্বৰ লিখি তাত তেওঁলোকক ফোন কৰাৰ ‘নিৰ্দেশনা’ দিয়া হৈছে। স্থানীয় ৰাইজে তেওঁলোকৰ দৃষ্টিগোচৰ হোৱাৰ লগে লগে লিখনিবোৰ ততাতৈয়াকৈ মচি পেলায়। বুধবাৰে পুৱা সংঘটিত ঘটনাৰ পিছৰে পৰা আৰক্ষী প্ৰশাসন ক্ৰমাৎ উদ্বিগ্ন হৈ পৰিছে।
কেৱল ভাবুকি দিয়া বাৰ্তাবোৰেই নহয়, মন্দিৰ চৌহদত কেইবাটাও লেম্পো ভঙা অৱস্থাত উদ্ধাৰ কৰা হয়। ইয়াৰ পিছত মন্দিৰৰ নিৰাপত্তাক লৈ প্ৰশ্ন উত্থাপন হ’বলৈ আৰম্ভ কৰিছে। একাধিক চিচিটিভি কেমেৰা আৰু ২৪ ঘণ্টাই আৰক্ষীৰ পহৰা থকাৰ পাছতো এনে ঘটনা কেনেদৰে সংঘটিত হ’ল সেই সন্দৰ্ভত তদন্ত আৰম্ভ হৈছে।
বাৰ্তা লিখাসকলৰ চিনাক্তকৰণৰ প্ৰচেষ্টা অব্যাহত আছে। অঞ্চলটোৰ চিচিটিভি ফুটেজো পৰীক্ষা কৰা হৈছে। মন্দিৰৰ সেৱক শ্যামা মহাপাত্ৰৰ মতে, “এই মন্দিৰ চৌহদটো অতি স্পৰ্শকাতৰ অঞ্চল। তথাপিও ইয়াত দুষ্কৃতিকাৰীয়ে প্ৰৱেশ কৰি ভাবুকিমূলক বাৰ্তা লিখিবলৈ সাহস কৰিছিল। কটকটীয়া নিৰাপত্তাৰ মাজতো কেনেকৈ হ’ল?”
জগন্নাথ মন্দিৰৰ ভক্ত ৰেণুবালা ত্ৰিপাঠীয়ে কয়, “শেহতীয়াকৈ একাংশ অচিনাক্ত ব্যক্তিয়ে মন্দিৰৰ বাহিৰৰ দেৱালত উঠি ভিতৰলৈ সোমাই গৈছে। তেওঁলোকক এতিয়াও চিনাক্ত কৰা হোৱা নাই। ইয়াৰ মাজতে পুনৰ এই ঘটনা ঘটিছে। আমি এটাৰ পিছত আন এটাকৈ ঘটা এনেধৰণৰ ঘটনাক লৈ অতিশয় চিন্তিত হৈছো।”
