দেশৰ নতুন প্ৰজন্মৰ মাজত ড্ৰাগছ আসক্তিৰ বৃদ্ধি সন্দৰ্ভত চৰকাৰে গভীৰ উদ্বিগ্নতা প্ৰকাশ কৰিছে। এই সমস্যাৰ সমাধানৰ বাবে কেন্দ্ৰীয় চৰকাৰে দেশজুৰি এটা নিচামুক্তি আন্দোলন আৰম্ভ কৰিছে। ইয়াৰ অংশ হিচাপে আজিৰ দিনা ডিফুৰ আৰবৰেটামত ইলেক্ট্ৰনিক আৰু ছপা মাধ্যমৰ সাংবাদিকসকলৰ বাবে এক কৰ্মশালা অনুষ্ঠিত হয়। জিলা প্ৰশাসনৰ সহযোগত চৰকাৰৰ ছচিয়েল জাষ্টিছ এনড্ এনপাৱাৰমেণ্ট শাখাই আয়োজন কৰা এই কৰ্মশালাত শতাধিক সাংবাদিকে অংশগ্ৰহণ কৰে ।
আনুষ্ঠানিক ভাৱে কৰ্মশালা খন উদ্ধোধন কৰি কাৰবি আংলং স্বায়ত্ত্বশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাঙে ড্ৰাগছে নৱ প্ৰজন্মৰ একাংশক ধ্বংস কৰাৰ কথা উল্লেখ কৰি ড্ৰাগছ মুক্ত কাৰবি আংলং গঢ় দিয়াত সাংবাদিক সকলক আগভাগ লবলৈ আহৱান জনায় ৷ কাৰবি আংলং জিলাৰ আৰক্ষী অধীক্ষক সঞ্জীৱ কুমাৰ শইকীয়াই গল্ডেন ট্ৰাইগেলৰ পৰা কিদৰে মণিপুৰ ; নাগালেণ্ড হৈ কাৰবি আংলঙৰ মাজেৰে ড্ৰাগছৰ সৰবৰাহ হয় তাৰ ব্যাখ্যা কৰি আৰক্ষীয়ে চলিব বছৰত কিমান ড্ৰাগছ জব্দ কৰিছে কিমান লোকক গ্ৰেপ্তাৰ কৰিছে সেই তথ্য দিয়ে ৷
ড্ৰাগছ আসক্ত যুৱক-যুৱতীক কিদৰে প্ৰথম ড্ৰাগছ ব্যৱসায়ীয়ে নিচাৰ প্ৰতি আসক্ত কৰিবলৈ জাল পাতে সেই বিষয়ে কোৱাৰ লগতে আইনত ড্ৰাগছৰ বেপাৰ কৰা সকলৰ বাবে কি ধৰণৰ শাস্তি আছে তাৰো ব্যাখ্যা কৰে ৷ অসম চৰকাৰৰ ছচিয়েল জাষ্টিছ এনড্ এনপাৱাৰমেন্ট বিভাগৰ অতিৰিক্ত সচিব ডা° ভাস্কৰজ্যোতি মান্তাই কৰ্মশালাৰ লক্ষ্য উদ্দেশ্য বিবৰি এক ভাষণ দি আলোচনা আৰম্ভ কৰে ৷ অৱসৰপ্ৰাপ্ত জিলা চেছন দণ্ডাধীশ ড° থানেশ্বৰ কলিতাই নিচাযুক্ত দ্ৰব্য বিক্ৰী কৰা লোকৰ বাবে আইনত থকা শাস্তি ; নিচাসক্ত সকলৰ বাবে থকা আইনকে সামৰি সমগ্ৰ আইনী দিশৰ ওপৰত বিস্তৃত ব্যাখ্যা আগবঢ়ায় ৷
ৰাজ্যিক সমন্বয়ক ডা° সন্দিপ হাঞ্চেই কেন্দ্ৰীয় চৰকাৰে আৰু ৰাজ্য চৰকাৰে নিচামুক্ত ভাৰতবৰ্ষ গঢ়াব বাবে লোৱা সকলো পদক্ষেপৰ সবিশেষ কৰ্মশালাত সাংবাদিক সকলক জনোৱাৰ পিছত আৰক্ষী অধীক্ষক সঞ্জীৱ শইকীয়া ; অৱসৰপ্ৰাপ্ত জিলা চেছন দণ্ডাধীশ থানেশ্বৰ কলিতাই সাংবাদিক সকলৰ বিভিন্ন প্ৰশ্নৰ উত্তৰ দিয়ে ৷ জিলা আয়ুক্ত নিৰলা ফাংচপীও উপস্থিত থকা কৰ্মশালাত শলাগৰ শৰাই আগবঢ়াই অতিৰিক্ত জিলা আয়ুক্ত অংকিতা বৰাই ৷ উল্লেখ যে ডিফুৰ বিভিন্ন বিদ্যালয়ৰ ছাত্ৰছাত্ৰী সকলক লৈ আবৰ্ত ভৱনতো নিচামুক্ত ভাৰতৰ আন এখন সভা সম্পন্ন হয় চছিয়েল জাষ্টিছ এনড্ এনপাৱাৰমেন্ট শাখাৰ উদ্যোগত ৷
